Skora á stjórnvöld að tryggja vernd flóttabarna sem annarra barna

Forsvarsmenn Þroskahjálpar, Barnaheilla, ADHD samtakanna, Sjónarhóls og Umhyggju hafa ritað undir áskorun til stjórnvalda um „að fara að lögum, virða mannréttindi og tryggja vernd allra barna, ekki síst flóttabarna, langveikra og fatlaðra barna.“

Í tilkynningu frá samtökunum er vísað í barnasáttmála Sameinuðu þjóðanna, sem lögfestur var á Íslandi 2013, þar sem kveðið sé á um „afar mikilvæg mannréttindi sem öll börn skulu njóta sem og skyldur ríkja til að veita þeim vernd og forgangsraða í þágu barna.“

Samningurinn áréttar þá meginreglu sem einnig er viðurkennd í íslenskum lögum að stjórnvöld skuli í ákvörðunum sínum og aðgerðum sem varða börn ávallt hafa að leiðarljósi það sem er börnunum fyrir bestu. Samkvæmt sáttmálanum eiga börn sjálfstæð réttindi og ber yfirvöldum að virða þau.

„Í 22. gr. Barnasáttmálans eru sérstök ákvæði varðandi skyldur ríkja til að tryggja börnum sem leita eftir réttarstöðu sem flóttamenn, hvort sem það er í fylgd foreldra eða annarra eða ekki. Þau eiga rétt á að fá „viðeigandi vernd og mannúðlega aðstoð við að nýta sér þau réttindi sem við eiga og kveðið er á um í samningi þessum og og öðrum alþjóðlegum löggerningum á sviði mannréttinda- eða mannúðarmála sem ríki þau er um ræðir eiga aðild að.“

Í 24. gr. barnasáttmálans er kveðið á um viðurkenningu ríkja á rétti barns „til að njóta besta heilsufars sem hægt er að tryggja, og aðstöðu til læknismeðferðar og endurhæfingar.“

Í 23. gr. barnasáttmálans er mælt fyrir um réttindi fatlaðra barna og skyldur ríkja til að veita þeim fullnægjandi vernd og stuðning.

Í samningi Sameinuðu þjóðanna um réttindi fatlaðs fólks, sem íslenska ríkið vinnur nú að fullgildingu á, eru ýmis ákvæði er varða mannréttindi fatlaðra barna og skyldur ríkja til að veita þeim margvíslega og fullnægjandi vernd og stuðning. Í 7. gr. samningsins eru sérstaklega áréttuð ýmis réttindi fatlaðra barna og skyldur ríkja til að tryggja að þau fái notið þeirra.

Við undirrituð skorum á hlutaðeigandi stjórnvöld að fara að lögum, virða ofangreind ákvæði og  gæta sérstaklega að þeim skyldum sem af þeim leiða í allri meðferð mála og ákvarðanatöku er varðar börn. Samkvæmt barnasáttmála Sameinuðu þjóðanna sem Ísland hefur lögfest skal ávallt hafa það sem barni er fyrir bestu að leiðarljósi þegar ákvarðanir eru teknar í málefnum þess. Öll börn, flóttabörn jafnt sem önnur börn, eiga ávallt að njóta þessara réttinda og verndar,“ segir í tilkynningunni.

Undir áskorunina rita þau Bryndís Snæbjörndóttir, formaður Landssamtakanna Þroskahjálpar, Árni Múli Jónasson, framkvæmdastjóri Landssamtakanna Þroskahjálpar, Elín H. Hinriksdóttir, formaður ADHD samtakanna, Þröstur Emilsson, framkvæmdastjóri ADHD samtakanna, María Hildiþórsdóttir, framkvæmdastjóri Sjónarhóls ráðgjafamiðstöðvar, Guðmundur Björgvin Gylfason, formaður Umhyggju, Ragna Marinósdóttir, framkvæmdastjóri Umhyggju, Erna Reynisdóttir, framkvæmdastjóri Barnaheilla – Save the Children á Íslandi og Kolbrún Baldursdóttir, formaður Barnaheilla – Save the Children á Íslandi.