Íslenski boltinn

Uppbótartíminn: Blikar skemmdu sigurhátíð FH-inga | Myndbönd

Damir Muminovic skoraði sigurmark Blika gegn FH. Hann fagnaði markinu með þjálfaranum Arnari Grétarssyni.
Damir Muminovic skoraði sigurmark Blika gegn FH. Hann fagnaði markinu með þjálfaranum Arnari Grétarssyni. vísir/anton
Tuttugasta umferð Pepsi-deildar karla í knattspyrnu fór fram í gær. Hverjir áttu góðan dag og hverjir áttu erfiðan dag? Hvað segir tölfræðin og hver var umræðan á Twitter? Vísir gerir hér upp umferðina á léttu nótunum.

Alls voru 27 mörk skoruð í leikjunum sex. Breiðablik sló fagnaðarlátum FH á frest og tryggði sér í leiðinni Evrópusæti. Eyjamenn náðu í mikilvægt stig gegn Val sem kemur þeim fjórum stigum frá Leikni sem er í vondum málum eftir tap fyrir Fylki. Skagamenn eru öruggir með sæti Pepsi-deildinni að ári og Stjarnan fór illa með KR í Vesturbænum. Evrópudraumur Fjölnismanna lifir enn eftir sigur á Víkingi í markaleik.

Umfjöllun og viðtöl úr leikjum umferðarinnar:

Breiðablik 2-1 FH

Fylkir 3-1 Leiknir

Keflavík 0-4 ÍA

KR 0-3 Stjarnan

ÍBV 3-3 Valur

Fjölnir 4-3 Víkingur

Garðar er kominn með átta mörk í Pepsi-deildinni.vísir/ernir
Góð umferð fyrir ...

... Garðar Gunnlaugsson

Garðar skoraði tvö góð mörk í 0-4 sigri ÍA gegn föllnum Keflvíkingum. Það er kannski ekki mikið afrek að vinna Keflavík í dag en sigurinn var mikilvægur og tryggir ÍA endanlega sæti í Pepsi-deildinni á næsta ári. Garðar hefur átt fínt sumar og er sem stendur markahæsti Íslendingurinn í deildinni með átta mörk, ekkert þeirra úr vítum.

... Eyjamenn

Útlitið var ekki bjart fyrir Eyjamenn þegar tíu mínútur voru eftir gegn Val í gær; 1-3 undir og það var fátt sem benti til þess að endurkoma væri í kortunum. En þá færði Ingvar Þór Kale, markvörður Vals, Eyjamönnum gjöf þegar hann missti boltann fyrir fætur Gunnars Heiðars Þorvaldssonar sem minnkaði muninn í 2-3. Aðeins tveimur mínútum síðar jafnaði Ian Jeffs metin með laglegu marki en hann hefur skorað í tveimur leikjum í röð. ÍBV er nú fjórum stigum frá fallsæti þegar einungis tvær umferðir eru eftir svo það verður að teljast líklegra en ekki að liðið haldi sæti sínu í deildinni.

... Atla Sigurjónsson

FH-ingar voru mættir á Kópavogsvöll til að fagna titlinum og sú virtist ætla að vera raunin þegar Atli Guðnason kom Fimleikafélaginu yfir á 72. mínútu. En Blikar gáfust ekki upp og aðeins tveimur mínútum síðar átti Atli Sigurjónsson gullsendingu inn á teiginn sem Jonathan Glenn skallaði í netið. Atli var ekki hættur og á 77. mínútu átti hann aðra frábæra fyrirgjöf inn á teiginn, nú á Damir Muminovic sem skilaði boltanum í markið. Blikar slógu því fagnaðarlátum FH á frest en Kópavogsliðið tryggði sér Evrópusæti með sigrinum og á enn veika von um að vinna Íslandsmeistaratitilinn. Atli getur verið sáttur með dagsverkið en hans bestu leikir í sumar hafa komið gegn FH.

Leiknismenn eru komnir með annan fótinn niður í 1. deild.vísir/pjetur
Vond umferð fyrir ...

... KR

Aðeins 515 áhorfendur sáu Stjörnuna vinna þægilegan sigur á andlausum KR-ingum á Alvogen-vellinum í gær. Stjörnumenn voru sterkari aðilinn allan tímann og þótt brottvísun Stefáns Loga Magnússonar og vítið sem dæmt var á markvörðinn hafi verið umdeilanlegt áttu KR-ingar ekkert skilið úr leiknum. KR hefur aðeins fengið 10 stig af 24 mögulegum í síðustu átta leikjum og það hlýtur að vera farið að hitna undir Bjarna Guðjónssyni, þjálfara liðsins, sem hefur mistekist að skila titli í hús í sumar, auk þess sem Evrópusætið er í hættu en KR er aðeins með þriggja stiga forskot á Val og Fjölni þegar tvær umferðir eru eftir.

... afskiptasama aðstoðardómara

Dómgæslan hefur verið í brennidepli í sumar og var það einnig í þessari umferð. Tvö umdeild víti voru dæmd, í leik Fylkis og Leiknis og KR og Stjörnunnar, en í báðum tilvikum virtust aðstoðardómarar sjá brotin og flagga á þau. Í Árbænum var Halldór Kristinn Halldórsson dæmdur brotlegur fyrir afar litlar sakir og í Vesturbænum virtist Stefán Logi Magnússon einfaldlega verja skot Guðjóns Baldvinssonar þegar vítið var dæmt. Stórir dómar sem voru líklega rangir.

... Leikni

Breiðhyltingar eru komnir ofan í ansi djúpa holu eftir leiki gærdagsins. Þeir eru nú fjórum stigum frá öruggu sæti þegar tvær umferðir eru eftir og vonin er því veik. Leiknismenn hafa hingað til gefið öllum liðum deildarinnar leik en það var ekki uppi á teningnum gegn Fylki í gær. Breiðhyltingar mættu einfaldlega ekki til leiks og tilraun þeirra til að spila 4-4-2 virkaði engan veginn. Eftir hálftíma leik var staðan 3-0, Fylki í vil og leik lokið. Leiknismenn sýndu smá lit í seinni hálfleik en það var of lítið og of seint. Fallið blasir við Leikni.

Veigar Páll hefur komið sterkur inn í lið Stjörnunnar í síðustu tveimur leikjum.vísir/anton
Skemmtilegir punktar af Boltavaktinni:

Kristinn Páll Teitsson á Alvogen-vellinum:

„Veit ekki hvað þetta var hjá Heiðari, skot eða fyrirgjöf þar sem það var enginn í teignum en hann lét vaða við varamannaskýlin. Eflaust verið að horfa á Florenzi skora mark af svipuðu færi í Meistaradeildinni á dögunum.“

Árni Jóhannsson á Nettó-vellinum:

„Það er hryssingslegt veðrið í Keflavík þessa stundina. 11° á celsíus, u.þ.b. 1/2 millimetri af rigningu og 9 m/s úr suðaustri. Það er samt alveg hægt að spila knattspyrnu í þessu skal ég segja ykkur og það mun verða gert.“

Guðmundur Marinó Ingvarsson á Fylkisvelli:

„Skot af löngu færi. Fast en Eyjólfur á að verja. Eyjólfur valdi frekar að fara frá. Furðulegt.“

Hæstu og lægstu einkunnir umferðarinnar:

Atli Sigurjónsson, Breiðablik - 8

Veigar Páll Gunnarsson, Stjarnan - 8

Guðjón Baldvinsson, Stjarnan - 8

Ásgeir Börkur Ásgeirsson, Fylkir - 8

Ragnar Bragi Sveinsson, Fylkir - 8

Aron Sigurðarson, Fjölnir - 8

Kennie Chopart, Fjölnir - 8

Garðar Gunnlaugsson, ÍA - 8

Patrick Pedersen, Valur - 8

Ian Jeffs, ÍBV - 8

Brynjar Hlöðversson, Leiknir - 2

Umræðan #pepsi365

Mark 20. umferðar Atvik 20. umferðar Markasyrpa 20. umferðar
Pepsi Max-deild karla

Mest lesið


Fleiri fréttir

Sjá meira


×

Mest lesið