Segjast hafa kannað færri síma en talið var í fyrstu

Athugun á símtölum úr símkerfi Hafnarfjarðarbæjar náði til mun færri símanúmera en áður hefur komið fram í fjölmiðlum, að því er segir í tilkynningu frá Hafnarfjarðarbæ. Er þetta vegna þess að athugunin tók ekki til númera þar sem þak er á greiðsluþátttöku bæjarins.

Sjá einnig: Könnuðu hverja kjörnir fulltrúar töluðu við í síma

Í yfirlýsingu frá Vodafone til Hafnarfjarðarbæjar kemur meðal annars fram að gögnin hafi einungis náð til símanúmera sem Hafnarfjarðarbær er áskrifandi og greiðandi að fullu. Í því felst að þau tóku ekki til númera sem bærinn greiðir að hluta en það er sú regla sem gildir almennt um farsíma starfsmanna og kjörinna fulltrúa.

 

Í framhaldi af kvörtun til Persónuverndar kom í ljós, samkvæmt upplýsingum frá Vodafone, að gögnin voru mun afmarkaðri en áður hefur komið fram. Þar sem þeim hafði verið eytt var Hafnarfjarðarbæ ekki unnt að ganga úr skugga um það en yfirlýsing Vodafone leiðir hið rétta í ljós.