Eyða jólafríinu í að skutla ókunnugum ókeypis milli staða

„Við vorum búnar að vera að hugsa mikið um klakann sem er á gangstéttunum og hvernig það væri fyrir eldra fólk að ganga í svoleiðis færð. Sér í lagi fólk sem ekki hefur bíl og þarf að koma sér á milli staða, svo sem í búðir eða annað. Þeir sem ekki hafa tök á slíku eru oft bara í hálfgerðu stofufangelsi,“ segir Sunna Dís Jónasdóttir sem ásamt systur sinni, Filippíu Lind Geirsdóttur, tók upp á að bjóða hverjum þeim sem vildi, upp á skutl án nokkurs endurgjalds, á svokallaðri Skutlara-fésbókarsíðu í gær og hafa viðbrögðin ekki látið á sér standa.

„Það er greinilega margt fólk þarna úti sem er í vandræðum, og skilaboðum hefur rignt inn hjá okkur á Facebook-síðurnar okkar, þar sem fólk segist munu fegið nýta þessa þjónustu,“ segir Sunna og bætir við að mikilvægt sé að hjálpa öðrum eftir fremsta megni. „Ég á ekki einu sinni bíl,“ segir hún og skellihlær, en þær systur hafa hertekið bíl móður sinnar, sem sjálf er í jólafríi og getur þannig vel séð af bílnum meðan dæturnar láta gott af sér leiða.

„Maður er alltaf eitthvað á ferðinni, af hverju ekki að kippa einhverjum með sem þarf á að halda? Sjálf er ég einstæð móðir og bíllaus, og hef oft hugsað með mér að það væri gott að fá aðstoð.“

Segist Sunna margoft hafa hugsað sér að láta eitthvað gott af sér leiða, en svo hafi hún séð eldri mann á gangi í gær, þar sem hann gekk á sannkölluðum skjaldbökuhraða yfir klakann.

„Það var kornið sem fyllti mælinn, svo við létum verða af því að setja þetta inn á síðuna. Í framhaldinu hafa svo fjölmargir aðrir boðið fram aðstoð sína, og þá sjáum við hvernig þetta hefur í raun ekki beint með okkur að gera, við fengum bara hugmynd á réttum tíma sem vindur svo upp á sig,“ bendir hún himinlifandi á.

Sunnu og Filippíu er mikið í mun að það komi fram að ekki séu þær að skutla gegn gjaldi, og þær hafi ekki áhuga á að vekja athygli á sjálfum sér, heldur snúist þetta um að vekja athygli á að fjöldi fólks er í vandræðum með að koma sér milli staða vegna færðarinnar, enda stórhættulegt oft á tíðum að hætta sér út á svellbunkana sem sums staðar hafa myndast.

„Þó við tölum til eldra fólks, þá er öllum velkomið að hafa samband við okkur,“ segir Sunna, og bendir á að þær systurnar séu sérlega opnar og skemmtilegar, og komi til með að skutla fólki saman, þannig geti þær einmitt slegið tvær flugur í einu höggi, eytt saman dýrmætum tíma og hjálpað þeim sem á þurfa að halda.