Naumur sigur Kolbeins og félaga

Kolbeinn Sigþórsson lék allan leikinn þegar Ajax vann 1-0 sigur á Den Haag á heimavelli í hollensku úrvalsdeildinni í fótbolta í dag.

Ajax gekk illa að brjóta gestina á bak aftur en sigurmarkið kom ekki fyrr en tvær mínútur voru til leiksloka. Hollensku meistararnir fengu reyndar góða hjálp við það en varamaðurinn Xander Houtkoop setti boltann í eigið mark.

Þetta var fjórði sigur Ajax í röð en liðið er 2. sæti deildarinnar með 62 stig, átta stigum á eftir toppliði PSV.

Kolbeinn verður væntanlega í eldlínunni þegar Ísland sækir Kasakstan heim í undankeppni EM á laugardaginn.