Kláraði stúdentinn á einu ári eftir 15 ára pásu: „Fjarlægur draumur að skella sér í háskóla“

„Ég hafði í tvígang farið á Háskóladaginn en vandamálið var að ég var ekki með stúdentspróf,“ segir Svanur Þór Smárason, sem útskrifaðist úr Keili 16. janúar en hann er 36 ára gamall. Svanur hafði þá ekki verið í skóla í 15 ár. Hann kláraði stúdentsprófið á einu ári, gagngert til að komast sem fyrst í háskóla.

„Ég var alltaf að skoða eitthvað nám sem ég komst ekki í og því var frábært fyrir mig að komast í skóla þar sem ég gat klárað stúdentinn á einu ári,“ segir Svanur sem vann fulla vinnu samhliða náminu.

„Þetta var rosalega erfitt skref og ég man eftir fyrsta deginum eins og hann hefði gerst í gær. Þarna eru flest allir í eldri kantinum og allir með sama markmið, að ætla sér að klára þetta nám.“

Svanur hafði vissulega áhyggjur áður en hann byrjaði í skólanum.

„Ég hafði ekkert lagt neitt sérstaklega mikið á mig í skóla áður og alltaf var markmiðið að rétt slefa í gegn. Þarna smitast áhugasemi kennara til manns og það hefur gríðarlega mikið að segja. Það er mikið aðhald og vel haldið utan um nemendur.“

Svanur segir að sjálfstraustið hafi aukist til muna þegar leið á skólaárið.

„Ég kom sjálfum mér á óvart á þessum tíma og ég mæli hiklaust með þessu, ég mæli í raun með að allir fari í nám. Ég kunni ekkert að læra og ekkert að glósa en þarna er svo mikill samhugur og hópurinn vinnur saman.“

Næsta skref hjá Svani er að sækja um í háskóla.

„Mig langar að fara í Háskólann í Reykjavík í tölvunarfræði og vonandi verður maður orðinn tölvunarfræðingur eftir þrjú ár. Fyrir nokkrum árum var það bara fjarlægur draumur að skella sér í háskóla.“