Gagnrýna hvernig staðið var að ráðningu nýs sviðsstjóra

Fulltrúar Sjálfstæðisflokksins í borgarráði lögðu til að Þorsteinn Sæberg Sigurðsson, skólastjóri Árbæjarskóla, yrði ráðinn í stöðu sviðsstjóra skóla-og frístundasviðs Reykjavíkurborgar en á aukafundi borgarráðs vegna málsins í dag var Helgi Grímsson ráðinn í stöðuna.

Kjartan Magnússon, fulltrúi sjálfstæðismanna í borgarráði, segir að tillaga þeirra um Þorstein hafi fengið hörð viðbrögð frá fulltrúum meirihlutans í ráðinu. Tillagan var meðal annars ekki tekin til afgreiðslu sem Kjartan segir að gangi gegn góðum stjórnsýsluháttum.

„Tillaga borgarstjóra um Helga Grímsson var tekin fyrir fyrst og þar sem meirihlutinn valdi hann var tillaga okkar um Þorstein ekki tekin til afgreiðslu. Við mótmæltum því harðlega því eðlilegast hefði verið að taka tillögurnar einfaldlega fyrir samtímis og kjósa um þær,“ segir Kjartan í samtali við Vísi.

Hann segir yfirleitt takast að afgreiða mannaráðningar í sátt í borgarráði en svo hafi nú ekki verið vegna þessara vinnubragða og er það óvenjulegt.

Sjálfstæðismenn lögðu fram bókun á fundinum þar sem meðal annars eru gerðar athugasemdir við það að ráðningin hafi ekki verið á útsendri dagskrá með fundarboði fyrir borgarráðsfund sem haldinn var í gær. Þá gera þeir einnig athugasemdir við það að hafa ekki fengið nein gögn um málið fyrr en á fundinum í gær.

„Þurftu fulltrúar minnihlutans að óska sérstaklega eftir frestun málsins og að fá gögn þessa viðamikla máls afhent enda var slíkt forsenda þess að þeir gætu tekið upplýsta ákvörðun. Var afgreiðslu málsins þá frestað um sólarhring svo fulltrúar minnihlutans gætu kynnt sér gögnin. Ljóst er að í þessu mikilvæga máli hugðist borgarstjóri ganga gegn þeirri reglu að borgarráðsmenn fengju tíma til að kynna sér umfangsmikil gögn málsins,“ segir í bókun sjálfstæðismanna.

Jafnframt kemur fram í bókunin að þessi vinnubrögð sýni að borgarstjóri líti „ekki á borgarráð sem stjórnvald, er tekur sjálfstæðar ákvarðanir, heldur stimpil sem hafi það hlutverk að staðfesta ákvarðanir sem hann hefur þegar tekið.“