Kokkarnir sneru aftur eftir að fyrirkomulaginu var breytt

Fjöldi þátttakenda í keppninni Matreiðslumaður ársins rúmlega fjórfaldaðist eftir að fyrirkomulagi keppninnar var breytt. Engin kona var á meðal þeirra sem komust í tíu manna undanúrslit en á sama tíma var dreifing þeirra meiri en oft hefur verið. Engir tveir starfa á sama veitingahúsi og landsbyggðin átti tvo fulltrúa sem er hærra hlutfall en oft áður.

Tíu kepptu í undanúrslitum í dag og mun liggja fyrir klukkan 16 hvaða fjórir munu keppa í úrslitum um titilinn Matreiðslumaður ársins næstkomandi sunnudag. Um frestaða keppni er að ræða en hætt var við að halda keppnina í september síðastliðnum þar sem aðeins fjórir skráðu sig til leiks. Úr varð nokkuð hitamál þar sem Jakob H. Magnússon, matreiðslumeistari og dómari, sagðist meðal annars telja að um metnaðar-, áhuga- og hvatningarleysi væri um að kenna.

„Ef kokkar ætla sér að keppa gera þeir það þrátt fyrir allar úrtölur og neikvæðni,“ skrifaði Jakob í pistli við það tilefni.

Matreiðslumaður ársins 2013 velti fyrir sér hvort menn væru eitthvað smeykir við að keppa.

„Það er bara eins og þessir nýju strákar þori ekki í keppnina,“ sagði Viktor Örn Andrésson í samtali við Vísi við sama tilefni.

Þorskur á dagskrá

Björn Bragi Bragason, sem situr í skipulagsnefnd keppninnar auk þess að vera einn dómara, segir að staðsetningin og tímasetningin hafi verið stóra vandamál.

„Á þessum tíma var mikið annríki á veitingastöðum borgarinnar og svo var landsliðið á fullu að keppa líka. Það fara margar hendur í það. Því fór sem fór,“ segir Björn Bragi. Hann er afar ánægður með hvernig til hafi tekist í ár. Fyrirkomulaginu var líka breytt á þann veg að kostnaður við þátttöku var enginn, þátttakendur sendu inn nafnlausar uppskriftir og einu leiðbeiningarnar voru að gera flottan rétt með þorsk í aðalhlutverki.

Björn Bragi segir að við mat á uppskriftunum hafi meðal annars horft til hráefnanýtingar, frumlegheita og samsetningu. Í dag framreiddu svo kokkarnir tíu réttina sína en þeir urðu að vera nákvæmlega í takt við uppskriftina sem þeir skiluðu. Í dag er sérstaklega horft til útlits á matnum, hvernig uppskrift var fylgt, framsetningu og svo bragðið sem vegur 60 prósent.

Hvorug konan komst áfram

Sautján sendu inn uppskrift en tveir umsækjenda voru konur. Hvorug þeirra komst áfram í úrslitin. Uppskriftirnar voru sendar inn án nafns.

„Það hallar mjög á konur í faginu okkar. Það vantar fleiri stelpur í kokkinn,“ segir Björn Bragi. Hann hafi engar upplýsingar um hlutfallið í stéttinni en gæti trúað að það væri ein kona fyrir hverja tíu karla.

„Ef þú horfir enn lengra aftur í tímann þá voru karlar ekkert í þessu. Konurnar elduðu heima og mönnuðu mötuneytin. Svo þegar þetta varð að atvinnugrein tóku karlarnir þetta,“ segir Björn Bragi.

Fara til fólksins

Úrslitin fara fram á sunnudaginn fyrir framan Smurstöðina þar sem fólki gefst kostur á að fylgjast með kokkunum athafna sig. Það var ekki í boði þegar keppnirnar fóru fram í húsakynnum Menntaskólans í Kópavogi.

„Við höfum átt frábært samstarf við Hótel og matvælaskólann undanfarin ár. En nú erum við að fara til fólksins. Það er ekki sjálfgefið að allir komi til okkar,“ segir Björn Bragi.

Sigurvegarinn keppir fyrir hönd Íslands í keppninni Matreiðslumaður Norðurlandanna í Danmörku í júní. Viktor Örn í Bláa lóninu vann keppnina í fyrra og því eiga Íslendingar titil að verja. Einu sinni áður hefur Ísland átt sigurvegara en árið 2003 vann Ragnar Ómarsson, kokkur á Nordica keppnina.