Segir að Messi hafi verið spenntur fyrir Inter

Argentínumaðurinn Juan Sebastian Veron segir að Lionel Messi, landi sinn, hafi eitt sinn sagt sér að hann hafi viljað spila með Inter á Ítalíu.

„Það eru nokkur ár síðan en hann sagði mér að hann vildi spila með Inter,“ sagði Veron í viðtali við Tuttosport á Ítalíu. „En ég vil taka skýrt fram að þetta er eitthvað sem hann sagði í fortíðinni.“

„Massimo Moratti var enn eigandi Inter og ég sé einfaldlega ekki fyrir mér að Leo fari frá Barcelona úr þessu,“ bætti Veron við.

Veron spilaði sjálfur með Inter á löngum ferli, sem og Sampdoria, Parma, Lazio, Manchester United og Chelsea. Hann lagði skóna á hilluna árið 2014.