Plastiðjan brann til kaldra kola: Talið að kviknað hafi í út frá rafmagni

Talið er að eldurinn sem kom upp í Plastiðjunni á Selfossi í gærkvöldi hafi kviknað út frá rafmagni. Húsið brann til kaldra kola í nótt og enn leynast þar eldglæður. 

Allt tiltækt lið Brunavarna Árnessýslu var kallað út um klukkan hálf ellefu í gærkvöldi. Mikinn reyk lagði yfir svæðið þannig að rýma þurfti nærliggjandi íbúðarhús. Opnuð var fjöldahjálparstöð í Vallaskóla, þangað sem íbúar voru hvattir til að fara, enda reykurinn baneitraður. Þar voru um hundrað manns þegar mest lét.

Hafþór Sævarsson birti myndbandið að neðan á Facebook-síðu sinni í gær.

Pétur Pétursson, settur slökkviliðsstjóri Brunavarna Árnessýslu, segir að um hafi verið að ræða gríðarlega erfitt verkefni. Áhersla hafi verið lögð á að verja byggingar í kring, þar á meðal trésmiðju sem tengd er Plastiðjunni með tengibyggingu. Það hafi tekist. 

„Það var mjög mikill eldur í þessu húsi. Það var augljóst að það yrði illa við það ráðið þar sem húsið er ekki mjög hólfað og mjög eldfim efni sem þar sem þarna brenna. Við einbeittum okkur frá upphafi að slá á mestan ofan á þeim eldi, auk þess að fara beint í það að verja nærliggjandi hús.“ 

Pétur segir alltaf umtalsverða hættu á ferðum þegar um þessa tegund húsa sé að ræða. Því hafi reykkafarar ekki verið sendir inn.

„Það var vitað strax að það væri enginn inni í húsinu og eldhafið var líka slíkt að það hefði verið ógæfulegt. Hætta skapast líka af eitruðum lofttegundum.“

Þá segir hann vettvanginn enn ótryggan. 

Annað myndband frá Hafþóri Sævarssyni frá því í gærkvöldi.

„Við vorum við slökkvistörf til klukkan sex í morgun. Eftir það höfum við farið fjórum sinnum til að slökkva í glæðum og svo falla járnplötur á þetta allt saman, og þá eru svona hreiður sem við náum illa til. Við sendum menn ekki inn í þetta því það er ákveðin fallhætta þarna.“

Málið fer í kjölfarið í hendur lögreglu, en að sögn Péturs  leikur grunur á að eldurinn hafi kviknað út frá rafmagni.

„Það er ekki hægt að segja það með óyggjandi hætti, en það má leiða að því líkum eftir frásögn starfsmanns sem var á staðnum að það hafi kviknað út frá rafmagnsbúnaði.“