Greiðslur til Þjóðkirkjunnar eigi ekki heima á fjárlögum

Fréttablaðið greindi frá því í dag að á kirkjuþingi hafi komið til umræðu að kirkjan aflaði sér tekna, til dæmis með skógrækt á prestjörðum. Formaður fjárhagsnefndar kirkjuþings hafi hinsvegar sagt að það borgaði sig ekki í núverandi umhverfi því refsað væri fyrir slíka tekjuöflun með skerðingu á fjárlögum.



„Á meðan við erum í fjárlagaumhverfi og erum meðhöndluð eins og hver önnur stofnun þá koma svona sértekjur til frádráttar," sagði Gísli á kirkjuþingi og bætti við: „Þannig að það þarf að passa það alveg sérstaklega í öllu reikningshaldi að sýna ekki sértekjur því þær eru bara mínusaðar frá fjárveitingunni."





Eignasala eins og að pissa í skóinn

Þegar fréttastofa bað séra Gísla að útskýra þessi orð nánar í dag sagði hann að kirkjan hafi tekið á sig tekjuskerðingu eftir hrun og reynt að draga úr högginu með því að selja eignir. „En þá hefur veirð tilhneiging hjá ríkisvaldinu til þess að skerða þá bara fjárveitingarnar á móti árið eftir, reikna þetta sem sértekjur og gera þá ráð fyrir að kirkjan geti þá bara haldið áfram að selja ennþá meiri eignir og svo framvegis. Sem er bara eins og að pissa í skóinn sinn."



Gísli segir að kirkjujarðasamkomulaginu svo kallaða, milli ríkis og kirkju, sé ekki fylgt með réttu á meðan greiðslurnar séu afgreiddar á fjárlögum. „Það hefur verið svolítið rugl í gangi. Kirkjan gekkst undir niðurskurð og gaf afslátt, í raun og veru, af sínum tekjum samkvæmt kirkjujarðasamkomulaginu fyrstu árin eftir hrun. En nú þykir mönnum að nóg sé komið og verði að stefna að því aftur að efna þetta samkomulag."



Hann dregur upp einfalda líkingu til að setja málið í samhengi. „Í raun og veru er þetta hliðstætt við það að ég seldi þér íbúð sem þú ættir að borga mér afborganir af en svo kæmir þú og segðist ætla að lækka afborgunina til mín á næsta ári, vegna þess að ég hefði haft aðrar tekjur."



Eigi betur heima á ríkisreikningi

Greiðslur ríkisins til þjóðkirkjunnar eigi því ekki heima í fjárlögum, heldur á ríkisreikningi. Á meðan hún er á fjárlögum séu eki forsendur fyrir kirkjuna að afla sér sértekna.



„Í raun og veru er ríkið bara að borga afborgun af ákveðnum kaupsamningi og það á auðvitað ekkert heima í fjárlögum. Aðrir kaupsamningar ríkisins eru þar ekki, þeir eru bara á ríkisreikningnum og þar á þetta kirkjujarðasamkomulag og greiðslurnar samkvæmt því heima."



Gísli segist binda vonir við að málin komist brátt á hreint þar sem viðræður séu nú að hefjast milli ríkis og kirkju um þetta fyrirkomulag.