Ók á Nesjavallaæðina eftir að sauðfé fipaði hann við akstur

Ökumaður slapp ómeiddur þegar hann ók á Nesjavallaæðina í nótt eftir að sauðfé hafði fipað hann við akstur. Tjón varð á heitavatnslögninni en leki kom ekki að henni.

Í dagbók lögreglunnar á höfuðborgarsvæðinu kom fram að bíllinn var óökufær og þurfti bílstjórinn að ganga nokkurn spöl áður en hann komst í farsímasamband til að gera viðvart. Hann gaf lögreglunni skýrslu um óhappið í nótt, þegar ættingi hafði sótt hann á slysstað.

Um Nesjavallaæð renna allt að 1,5 tonn á sekúndu af 85 gráðu heitu vatni og myndi sá sem yrði fyrir því slasast lífshættulega. Hitaveita Orkuveitu Reykjavíkur á höfuðborgarsvæðinu sækir um 40 prósent af heita vatninu í Nesjavallavirkjun.

Orkuveita Reykjavíkur segir að nokkrum sinnum hefur verið ekið á lögnina á síðustu árum, en það hefur jafnan verið að vetrarlagi, annað hvort í hálku eða í miklum snjó. Það varð til þess að nú lokar Vegagerðin veginum yfir veturinn og hann ekki ruddur.

Veitumenn voru kallaðir til þegar bíllinn var fjarlægður í morgun og tók Eiríkur S. Aðalsteinsson vélstjóri myndirnar sem fylgja fréttinni.