Ummæli Elínar valda uppnámi meðal Sjálfstæðismanna

Ummæli Elínar Hirst, þingkonu Sjálfstæðisflokksins, hafa fallið í grýttan jarðveg í röðum gegnra og gæfra Sjálfstæðismanna; ummæli þess efnis að komið sé gott með afskipti Davíðs Oddssonar og svo forseta Íslands, Ólafs Ragnar Grímssonar, þá skorti auðmýkt og mættu láta „okkar góða leiðtoga [Bjarna Benediktsson] í friði. Það eru nýjir tímar og ný viðhorf sem þeir skynja því miður ekki nógu vel.“

Orð Elínar koma að sönnu á óvart, því talið hefur verið að bakland hennar í Sjálfstæðisflokknum liggi einmitt á þessum slóðum, meðal þeirra sem eru og hafa verið handgengnir Davíð Oddssyni, svo sem Birni Bjarnasyni fyrrverandi dómsmálaráðherra og svo Hannesi Hólmsteini Gissurarsyni prófessor. Má í því sambandi benda á að eiginmaður Elínar, Friðrik Friðriksson, var á sínum tíma kosningastjóri Davíðs.

Elín sjálf sögð hafa ekkert til málanna að leggja

Nema, margir innmúraðir og innvígðir eru Elínu beinlínis reiðir fyrir þessa ákúru. Jón Magnússon, lögmaður og fyrrverandi Alþingismaður, skrifar reiðlegan bloggpistil undir fyrirsögninni „Þeir þvælast bara fyrir“ og þykir þessi ábending Elínar alveg úr vegi.

Í pistli sínum beinir hann sjónum að Elínu sjálfri og finnst hún vera að henda steinum úr glerhúsi: „Athyglisvert var að sjá þegar farið var yfir störf þingmanna á síðasta þingi að Elín tjáði sig nánast aldrei. Hafði ekkert til málanna að leggja.“

Veglausar blúndukerlingar í Sjálfstæðisflokknum

Og Brynjari Níelssyni alþingismanni Sjálfstæðismanna er ekki skemmt:

„En alltaf hefur fundist svolítið billegt að afgreiða gagnrýni frá mönnum með mikla þekkingu og reynslu á pólitíska sviðinu á þann veg að þeir eigi að þegja því nú séu komnir nýir tímar sem þeir skynji ekki. Við getum ekki krafist þess að vera látin í friði,“ skrifar Brynjar gætilega á Facebookvegg sinn.

En Baldur Hermannsson, fyrrverandi framhaldsskólakennari; flokkshollur Sjálfstæðismaður svo af ber, ákaflega handgenginn Davíð Oddssyni, segir hins vegar hreint út það sem „Valhöll“ er að hugsa, ef svo má segja: „Hvernig er það eiginlega með Sjálfstæðisflokkinn, geta þeir ekki druslast til þess að finna almennilegar kellingar á framboðslistana hjá sér, þetta eru eintómar blúndukellingar sem þeir hampa núna, veglausar í samfélaginu og til fárra hluta nýtilegar.“

Hvernig er það eiginlega með Sjálfstæðisflokkinn, geta þeir ekki druslast til þess að finna almennilegar kellingar á...

Posted by Baldur Hermannsson on Sunday, September 13, 2015