Um tíu þúsund flóttamenn til Austurríkis síðastliðinn sólarhring

Um tíu þúsund flóttamenn mættu til Austurríkis í dag. Fréttastofa breska ríkisútvarpsins BBC greinir frá þessu á vef sínum. Þar kemur fram að flóttamennirnir voru upphaflega sendir til Ungverjalands af yfirvöldum í Króatíu sem sögðust ekki geta við fleirum. Um tuttugu þúsund flóttamenn hafa komið til Króatíu síðan á miðvikudag en yfirvöld höfðu áður boðið þá velkomna.

Yfirvöld í Ungverjalandi ákváðu að senda flóttamennina til Austurríkis og sökuðu yfirvöld í Króatíu um að fara ekki eftir reglum um skráningu flóttamanna. BBC segist hafa heimildir fyrir því að yfirvöldum í Ungverjalandi hefðu einnig láðst að fara eftir þeim reglum.

Lögreglan í Austurríki taldi um níu þúsund manns hafa farið yfir landamærin síðasta sólarhringinn og er talið að sú tala sé nú komin í tíu þúsund.

Innanríkisráðherra Austurríkis, JohannaMikl-Leitner, sakaði nágrannalöndin um að fara ekki eftir reglum Evrópusambandsins.

Einn flóttamannanna sem kom til bæjarins Heiligenkreuz í Austurríki í dag frá Ungverjalandi sagði við AP-fréttaveituna að honum liði eins og hann væri endurfæddur. „Það skiptir engu máli hvort mér seinkar eða hvort ég verð hér í tvo daga. Það mikilvæga er að ég loksins kominn og er öruggur.“