„Það er nú til rannsóknar hvers vegna gögnunum var leynt“

„MS var beðin um gögn en afhenti ekki Samkeppniseftirlitinu gögn sem voru til,“ segir Ólafur Stephensen, framkvæmdastjóri Félags atvinnurekenda, í svari við fréttatilkynningu Ara Edwalds, forstjóra Mjólkursamsölunnar, þar sem Ólafur var sakaður um „vítaverð ummæli“ og að byggja málflutning sinn ekki á staðreyndum.

Ólafur hafði sagt MS leyna gögnum fyrir Samkeppniseftirlitinu en því hafnaði Ari Edwald. Ólafur hefur nú svarað Ara þar sem hann vitnar í fréttatilkynningu Samkeppniseftirlitsins frá því í desember síðastliðnum, um samkeppnismálið, en þar sagði Samkeppniseftirlitið MS hafa lagt fyrir áfrýjunarnefnd samkeppnismála samning við Kaupfélag Skagfirðinga frá 15. júlí 2008.

Samkeppniseftirlitið sagði MS aldrei hafa vísað til eða greint eftirlitinu frá þessum samningi við rannsókn málsins þrátt fyrir að ítrekað hafi verið óskað eftir skýringum og gögnum frá MS. „Það er nú til rannsóknar hvers vegna gögnunum var leynt. Málflutningur forstjóra MS dæmir sig sjálfur í ljósi þessara staðreynda málsins,“ segir Ólafur en svar hans má lesa í heild hér fyrir neðan:

Í fréttatilkynningu Samkeppniseftirlitsins í desember síðastliðnum um samkeppnismálið, sem hér um ræðir, kom eftirfarandi fram.

„Fyrir áfrýjunarnefnd lagði MS í fyrsta sinn fram tiltekið gagn, samning við Kaupfélag Skagfirðinga frá 15. júlí 2008. Undir rannsókn málsins hafði MS aldrei vísað til eða greint Samkeppniseftirlitinu frá þessum samningi, þrátt fyrir að Samkeppniseftirlitið hefði ítrekað óskað eftir skýringum og gögnum frá MS vegna umræddrar verðlagningar. Í úrskurði áfrýjunarnefndar segir um þetta:

„Þótt ekki hafi komið haldbærar skýringar á því hjá áfrýjanda hvers vegna bæði samningurinn hafi ekki verið lagður fram við meðferð málsins hjá Samkeppniseftirlitinu né grundvallargögn um efndir hans og uppgjör hjá áfrýjunarnefndinni telur nefndin sér skylt á grundvelli rannsóknarreglu stjórnsýsluréttar að koma málinu í þann farveg að upplýst sé um þessi atriði. Við munnlegan málflutning skýrðist málið ekki frekar að þessu leyti. Við svo búið telur áfrýjunarnefndin sér ekki unnt að taka efnislega afstöðu til málsins. Verður því ekki komist hjá því að ógilda hinn kærða úrskurð Samkeppniseftirlitsins og leggja fyrir eftirlitið að taka á ný afstöðu til málsins að undangenginni frekari rannsókn og að fengnum sjónarmiðum er varða þýðingu samningsins á milli áfrýjanda og KS frá 15. júlí 2008, uppgjöri á milli aðila hans og efndum á því tímabili sem meint brotastarfsemi stóð yfir.“

Samkeppniseftirlitið mun í samræmi við úrskurð áfrýjunarnefndar taka málið aftur til meðferðar. Jafnframt mun Samkeppniseftirlitið taka til rannsóknar hvaða ástæður liggja fyrir því að umræddur samningur var ekki lagður fyrir eftirlitið við rannsókn málsins, en viðurlög geta legið við því að halda upplýsingum frá eftirlitinu við rannsókn máls.“

Um þetta þarf ekki að hafa mikið fleiri orð. MS var beðin um gögn en afhenti ekki Samkeppniseftirlitinu gögn sem voru til. Við málflutning fyrir áfrýjunarnefnd komu ekki fram haldbærar skýringar á því að gögnunum hefði verið leynt fyrir stjórnvaldinu. Það er nú til rannsóknar hvers vegna gögnunum var leynt. Málflutningur forstjóra MS dæmir sig sjálfur í ljósi þessara staðreynda málsins.