De Gea fer með í æfingaferð United

David De Gea mun að öllu óbreyttu halda með Manchester United í æfingaferð til Bandaríkjanna en markvörðurinn hefur verið orðaður við Real Madrid síðustu vikurnar.

De Gea á eitt ár eftir af samningi sínum við United en félagið er ekki sagt viljugt að selja hann til Real Madrid nema að varnarmaðurinn Sergio Ramos komi í staðinn.

United vill gjarnan framlengja samning De Gea sem er þó sagður áhugasamur um að fara aftur til Madrídar, þar sem hann ólst upp. De Gea er 24 ára gamall og er uppalinn hjá Atletico Madrid.

Fyrsti leikur Manchester United í æfingaferðinni verður gegn Club America á föstudaginn.