Deulofeu samdi við Everton

Everton hefur gengið frá kaupum á Gerard Deulofeu frá Barcelona fyrir sex milljónir evra, jafnvirði tæplegra 900 milljóna króna.

Félagaskiptin hafa verið staðfest á heimasíðum Everton og Barcelona en Delofeu, sem var lánsmaður hjá Everton á þarsíðustu leiktíð, verður formlega leikmaður Everton um næstu mánaðamót.

Hann hefur nú skrifað undir þriggja ára samning við félagið en Everton á möguleika á að framlengja samninginn um eitt ár til viðbótar.

Barcelona á þó forkaupsrétt á kappanum og getur keypt hann aftur til félagsins gegn því að uppfylla ákveðin skilyrði sem ekki eru tilgreind nánar.

Deulofeu kom við sögu í 29 leikjum hjá Everton á tímabililð 2013-14 og skoraði þrjú mörk. Hann var svo í láni hjá Sevilla á síðustu leiktíð og vann Evrópudeild UEFA með félaginu.

Áður hafði Everton gengið frá samningi við Tom Cleverley í sumar.