Bale frá í þrjár vikur

Gareth Bale mun ekki spila með Real Madrid er liðið mætir Atletico Madrid í síðari viðureign liðanna í 8-liða úrslitum Meistaradeildar Evrópu í vikunni.

Fyrri leiknum lauk með markalausu jafntefli á heimavelli Atletico en Bale meiddist eftir aðeins fjórum mínútum eftir að hann kom inn á sem varamaður í 3-1 sigri Real á Malaga um helgina.

Bale var greindur með meiðsli í vöðva í kálfa á vinstri fæti og líklegt að hann verði frá næstu þrjár vikurnar.

Þetta er áfall fyrir Real Madrid því Luka Modric spilar mögulega ekki meira með liðinu á tímabilinu eftir að hafa hlotið hnémeiðsli í leiknum um helgina. Þá er Karim Benzema tæpur fyrir leikinn gegn Atletico á miðvikudagskvöld.