Putin telur litlar líkur á stríði

Vladimir Putin, forseti Rússlands, telur litlar líkur á stríði milli Rússlands og Úkraínu. Þetta sagði forsetinn í viðtali í Rússlandi en hann lagði áherslu á að vopnahlé í Úkraínu, sem samið var um í Minsk í Hvíta-Rússlandi 12. febrúar síðastliðinn, njóti stuðnings hans.

Þetta var í fyrsta skiptið sem Putin tjáir sig frá því ritað var undir samkomulagið um vopnahlé. Hann var meðal annars spurður hvort hætta væri á stríði miðað við ástandið í austur Úkraínu. „Svo skelfilegur atburður er ekki líklegur og ég vona að það komi aldrei til þess,“ sagði Putin og benti á að ef farið verður eftir þeim vegvísi að friði sem var samþykktur í Minsk þá muni ástandið í Úkraínu jafna sig.

„Evrópa hefur jafn mikinn áhuga á því og Rússland. Það vill enginn átök við landamæri Evrópu, sérstaklega ekki vopnuð átök.“

Fréttastofa breska ríkisútvarpsins BBC segir Putin hafa verið öruggan með sig á meðan hann svaraði léttum spurningum í viðtalinu um ástandið í Úkraínu. Hann neitaði því að rússnesk yfirvöld veittu aðskilnaðarsinnum í austur Úkraínu aðstoð og sagði stjórnvöld í Úkraínu halda þessu fram til að reyna að fela þá staðreynd að þau ráði ekki við verkamenn og bændur.