Heimilt að sjá gosið úr tíu kílómetra fjarlægð

Ferðaþjónustuaðilar í Mývatnssveit skipuleggja nú jeppaferðir um Ódáðahraun langleiðina að Holuhrauni eftir að almannavarnir minnkuðu bannsvæðið umhverfis gosstöðvarnar. Leyft er að fara á útsýnisstað um tíu kílómetra frá gígnum.

Stór hluti hálendisins norðan Vatnajökuls hefur verið bannsvæði undanfarið hálft ár en nú segja almannavarnir að dregið hafi það mikið úr eldgosinu að óhætt sé að minnka lokunarsvæðið. Enn er þó talin hætta á hlaupi um farveg Jökulsár á Fjöllum og því er almenningi áfram bannað að aka leiðina frá Möðrudal. Þá er öll umferð áfram bönnuð um Öskjuleið frá Hrossaborg á Mývatnsöræfum.

Fólki leyfist hins vegar núna að nálgast gosstöðvarnar með því að fara leiðir vestan Öskju, til dæmis jeppaslóða sem liggur frá Mývatni um Ódáðahraun og að útsýnisstað sunnan við fjallið Kattbeking. Nýtt hættumat, sem kynnt var í dag, setur þann stað utan bannsvæðis.

Oddviti Mývetninga, Yngvi Ragnar Kristjánsson, benti raunar á þennan möguleika strax í haust og ók þá þessa leið í fylgd lögreglu og björgunarsveitar. Hann segir að frá hól einum sunnan Kattbekings hafi eldgosið blasað við. 

Yngvi Ragnar kvaðst í samtali við Stöð 2 í dag vita til þess að 4-5 ferðaþjónustuaðilar fyrir norðan væru þegar byrjaðir að skipuleggja jeppaferðir þessa leið. Hann segir jeppafæri nú mjög gott, áætlar þetta um tveggja stunda akstur úr Mývatnssveit. Veðurspáin sé hins vegar leiðinleg fyrir helgina og býst hann ekki við að menn fari fyrstu ferðir fyrr en eftir helgi.

Almannavarnir vara menn þó við því að gasmengun frá eldstöðinni geti enn verið mikil utan við lokunarsvæðið. Menn eru því hvattir til að sýna ítrustu varfærni, vera með viðeigandi viðvörunar- og hlífðarbúnað og kynna sér spár um gasdreifingu á vefsíðu Veðurstofunnar áður en lagt er í hann.