Tveir + einn í Salnum

Annað kvöld flytja Sif Margrét Tulinius fiðluleikari og Anna Guðný Guðmundsdóttir píanóleikari Sónötu í Es-dúr opus 12 no. 3 og Sónötu í A-dúr opus 30 no. 1 eftir Ludwig Van Beethoven og Sif frumflytur verkið Praesentia eftir Huga Guðmundsson.

Tónleikarnir verða í Salnum í Kópavogi kl. 19.30 með tónleikaspjalli Árna Heimis Ingólfssonar þar sem hann spjallar við tónskáld kvöldsins ásamt hugleiðingum um Beethoven.

Tónleikarnir eru hluti af tónleikaröðinni Tveir+einn sem Sif og Anna Guðný standa fyrir. Á öllum þessum tónleikum flytja þær fiðlusónötur Beethovens auk þess sem Sif frumflytur verk fyrir einleiksfiðlu eftir íslenskt tónskáld.

„Fyrstu tónleikarnir voru í haust og þá frumflutti ég verk eftir Atla Ingólfsson sem var ákaflega vel tekið en nú er komið að Huga. Okkur Önnu Guðnýju langaði til þess að taka fyrir svona bálk á borð við fiðlusónötur Beethovens sem spanna langt ferli og gefa góða og áhugaverða yfirsýn yfir stóran hluta af hans ferli.

Það er ákveðin nálgun að blanda saman gömlu og nýju efni á tónleikum. Enda ágætt að hafa í huga að Beethoven var eitt sinn samtímatónskáld og það voru einhverjir sem pöntuðu verk frá honum. Núna er það ég sem panta verk frá íslenskum tónskáldum. Það er ákaflega gaman að kynnast því hvernig þeir vinna og fá að fara ofan í saumana á þeirra ferli. Það er líka skemmtilegt hvað það er mikil gróska í klassískri tónlist á Íslandi í dag og mikið af tónskáldum að gera flotta hluti.

Ég hef líka verið að skora á tónskáldin að fullnýta hljóðfærið og láta reyna á mig í senn. Að auki þá felst mikil áskorun í því fyrir mörg tónskáld að skrifa einleiksverk. En þetta hefur verið mjög ánægjulegt og ég tek eina tónleika í einu. Safna svo í þá næstu sem er líka heilmikil vinna og fikra mig svona áfram þar til við Anna Guðný verðum búnar að klára þessa fimm tónleika seríu.“