Niðurstaða toppbaráttunnar: Titillinn fer í Hafnarfjörðinn

Pepsi-deild karla í fótbolta hefst á sunnudaginn með fjórum leikjum, en stórleikur umferðarinnar er á mánudaginn þegar KR og FH eigast við í Frostaskjóli. Sá leikur verður í beinni útsendingu á Stöð 2 Sport og Pepsi-mörkin verða sama kvöld klukkan 22.00, en fyrsta beina útsendingin verður frá leik nýliða ÍA og Íslandsmeistara Stjörnunnar á sunnudaginn klukkan 16.30.

Fréttablaðið hefur talið niður í fyrsta leik með árlegri spá um sætaröðun liðanna og eins og sjá má hér að ofan er FH spáð Íslandsmeistaratitlinum. FH verður í baráttu við KR og Stjörnuna, en Breiðabliki er spáð mögulegu Evrópusæti.

Bestir í öllu

„Það er mjög auðvelt að spá FH sigri í sumar,“ segir Hjörtur Hjartarson, sérfræðingur Pepsi-markanna, um meistaraefnin í Hafnarfirðinum.

„FH er með bestu kallana, mestu breiddina, frábæran þjálfara, sigurhefð og hungur í að endurheimta titilinn. Það er allt sem bendir til þess að liðið verði meistari,“ segir hann.

Hjörvar Hafliðason, annar sérfræðingur Pepsi-markanna, hefur áhyggjur af markaskorun liðsins.

„FH skoraði ekki mikið í Lengjubikarnum í vetur, ekki einu sinni gegn BÍ/Bolungarvík sem allir rúlluðu yfir. Steven Lennon, eins öflugur leikmaður og hann er, hefur aldrei verið stöðugur markaskorari,“ segir hann.

Hjörtur bendir þó á að hann sé nú að spila fyrir mun betra lið en áður. Lennon skoraði sex mörk í tíu leikjum þegar hann kom í fyrra en var áður á mála hjá Fram.

„Er auðveldara að skora fyrir FH, þar sem allir liggja til baka á móti þér, heldur en Fram?“ spyr Hjörvar. „Já, það er bara þannig,“ svarar Hjörtur sem var mikill markaskorari á sínum ferli og markakóngur efstu deildar 2001.

Þjálfarinn spurningarmerki

KR missti öfluga leikmenn þegar Baldur Sigurðsson og Haukur Heiðar Hauksson fóru í atvinnumennsku, en á móti hafa komið mjög öflugir leikmenn. Núna rétt fyrir mót kom Óskar Örn Hauksson til baka eftir að hafa verið á láni í Kanada.

„Það breytir öllu að fá Óskar aftur þarna inn. Það gjörbreytir ásýnd liðsins. Svo fékk liðið líka feitasta bitann á markaðnum í Pálma Rafni og auðvitað Skúla Jón í vörnina. Hann er frábær leikmaður,“ segir Hjörtur.

Bjarni Guðjónsson tók við KR-liðinu af Rúnari Kristinssyni en hann er með Guðmund Benediktsson sér til aðstoðar. Bjarni þjálfaði meistaraflokk fyrst í fyrra og féll þá með Fram-liðið.

„Honum hefði verið hampað hefði þetta dæmi hjá Fram gengið upp en að sama skapi verður að gagnrýna að hann á eitt tímabil að baki sem þjálfari í efstu deild og fór lóðrétt niður. Þetta er ekki ferilskráin sem maður vill taka með sér inn í KR. En hann þekkir vissulega vel til þarna og var leiðtogi sem leikmaður,“ segir Hjörtur.

Titill sem skiptir máli

Stjarnan verður í baráttunni um Íslandsmeistaratitilinn en ver hann ekki samkvæmt spánni. Liðið gerði vel á leikmannamarkaðnum og fyllti í skörðin sem mynduðust eftir síðasta tímabil.

„Mikilvægast fyrir Stjörnuna var að fá Halldór Orra aftur og að halda Ólafi Karli. Stjarnan mun samt kynnast því að það er miklu erfiðara að verja titilinn heldur en að vinna hann. Aðeins FH hefur varið titilinn á undanförnum árum,“ segir Hjörvar.

Stjarnan hefur verið samfleytt í efstu deild frá 2009 og var í baráttu um Evrópusæti í nokkur ár áður en liðið vann titilinn. Það tókst ekki og þá tapaði liðið tvö ár í röð í bikarúrslitum.

„Þessi sigur Stjörnunnar síðasta haust var ekki bara einhver sigur heldur er þetta titill sem breytir félaginu. Hingað til höfum við vanist því að Stjarnan tapi alltaf í stóru leikjunum. Þetta hefur mikla þýðingu en að sama skapi vilja núna allir vinna þá,“ segir Hjörvar.

Getur strítt stóru liðunum

„Ef allt gengur upp hjá Breiðabliki getur það blandað sér í baráttuna um titilinn,“ segir Óskar Hrafn Þorvaldsson, íþróttastjóri 365, um möguleika Breiðabliks.

Blikar hafa spilað mjög vel á undirbúningstímabilinu og unnið tvo titla. „Arnar hefur unnið gott starf í vetur. Hann fékk hópinn snemma, hefur spilað mikið á sömu mönnunum og þarna eru allir í toppstandi. Þá er liðið með besta bakvarðapar landsins.“

Haldist allir lykilmenn liðsins heilir spáir Óskar því að þeir geti strítt stóru liðunum en nokkur spurningarmerki eru í hópnum.

„Það sem ég hef áhyggjur af er staða varnarsinnaðs miðjumanns. Mér finnst Oliver og Gunnlaugur Helgi ekki verið nógu sannfærandi og þá set ég stórt spurningarmerki við bosníska framherjann Ismar Tandir,“ segir Óskar.