Ný tónleikaröð með verkum Atla Heimis

Ný tónleikaröð með verkum Atla Heimis Sveinssonar er að fara af stað en fyrstu tónleikarnir í tónleikaröðinni fara fram í kvöld í Mengi. Tónleikaröðin, sem ber nafnið, Atli Heimir og árdagar framúrstefnunnar á Íslandi, heldur svo áfram í ágúst og verður síðasta föstudag í mánuði fram á vor. Brautryðjandi verk tónskáldsins Atla Heimis Sveinssonar verða í hávegum höfð í tónleikaröðinni en hún er samstarfsverkefni Mengis og Listaháskóla Íslands.

Upphafstónleikarnir sem fram fara í kvöld munu þjóna sem kynning á seríunni í heild sinni, en á sama degi munu aðstandendur hátíðarinnar einnig hefja söfnun á Karolinafund til að fjármagna framhaldið á þessu metnaðarfulla verkefni. Frá og með ágústmánuði og fram í apríl 2016 mun síðasti föstudagur hvers mánaðar vera helgaður verkum Atla Heimis.

Borgar Magnason, listrænn stjórnandi seríunnar, hefur unnið að heildar samantekt á höfundarverki Atla Heimis undanfarið ár. Við þá vinnu kom í ljós heilt ævistarf af verkum í framúrstefnu stíl sem samin eru á árunum fyrst eftir að Atli Heimir kynnist Stockhausen og evrópskri framúrstefnu. Það sem kemur helst á óvart við þessi metnaðarfullu og framúrstefnulegu verk hans er að sum hafa aldrei verið flutt, hvað þá tekin upp og mörg hver hafa ekki heyrst síðan þau voru frumflutt. Fjöldinn allur af gríðarlega vönduðum verkum bíður því flutnings en flutningur á úrvali þeirra er leiðarstefið í tónleikaröðinni, þó einleiks- og kammerverk frá öðrum tíma fái einnig að fylgja með.

Á tónleikunum í kvöld í Mengi koma fram sannkallaðar kanónur á sínu sviði en það eru þau, Melkorka Ólafsdóttir þverflautuleikari, Arngunnur Árnadóttir klarinettleikari, Michael Kaulartz fagottleikari og Örn Magnússon er lesari. Þau verk sem flutt verða eru Trio für Bläser (1960) en um frumflutning er að ræða, Djúp er sorgin // Tief ist die Trauer (2002) fyrir einleiks flautu, Fönsun IV (1968) fyrir einleiks fagott, Dona nobis pacem (1983) fyrir einleiks klarinett og lesara.



Eftirfarandi er í boði ef verkefnið er stutt í gegnum Karolinafund.

Á sjötta og sjöunda áratugnum samdi Atli Heimir Sveinsson nokkurn fjölda tónverka sem skrifuð voru á óhefðbundinn, og oft á tíðum abstrakt, myndrænan hátt. Mörg verkin koma fyrir sjónir sem myndverk frekar en tónverk og var þetta tilraun Atla Heimis til að opna fyrir túlkun verkanna og fá flytjendur til að taka meiri þátt í sköpun þeirra.

Eitt póstkort (þrykkt í letterpress) með teikningu eftir Atla Heimi Sveinsson, upp úr tónverkum hans Fönsun IV og Mengi.

Pakki með fjórum póstkortum (þrykkt í letterpress) með teikningum eftir Atla Heimi Sveinsson, upp úr tónverkum hans Fönsun IV og Mengi.

Silkiþrykk í takmörkuðu upplagi í stærðinni 28 x 40 cm af grafísku tónverki eftir Atla Heimi Sveinsson.

Pakki með fjórum silkiþrykkum í stærðinni 28 x 40 cm í takmörkuðu upplagi af mynd-tónverkum eftir Atla Heimi Sveinsson.

Silkiþrykkt sería af níu myndum úr tónverkinu For Boys and Girls eftir Atla Heimi Sveinsson samið fyrir SÚM hópinn árið 1967. Takmarkað upplag.



Dagskrá opnunarhátíðarinnar

Fyrirlestur: Um framúrstefnuna í höfundarverki Atla Heimis Sveinssonar.

Fyrirlesari: Þráinn Hjálmarsson

Staður og stund: Sölvhóll kl.13.00

Tónleikar: Trio für Bläser // Hljóðaljóð

Staður og stund: Mengi við Óðinsgötu klukkan 21.00 (húsið opnað 20.00). Miðasala við innganginn.