Bragðdauft jafntefli á San Siro

AC Milan og Atalanta skyldu jöfn í bragðdaufum leik á San Siro í kvöld en AC Milan skaust í bili upp fyrir Sassuolo sem á leik til góða á morgun með stiginu.

Heimamenn í AC Milan voru búnir að vinna þrjá leiki í röð og voru að blanda sér aftur inn í toppbaráttuna en Atalanta gat komist upp fyrir AC Milan með sigri.

Það var fátt um fína drætti í leiknum en heimamenn í AC Milan voru líklegri til þess að stela sigrinum en liðin skyldu að lokum jöfn, 0-0.

Þá töpuðu Emil Hallfreðsson og félagar í Hellas Verona í kvöld enn einum leiknum en að tólf umferðum loknum hefur Verona ekki enn unnið leik á þessu tímabili.

Emil var í byrjunarliðinu í dag og lék allar 90 mínútur leiksins í 0-2 tapi gegn Bologna en liðið hefur átt í miklum vandræðum með að skora á þessu tímabili.