Fiorentina og Liverpool í viðræðum um Borini

Samkvæmt heimildum SkySports eru Fiorentina og Liverpool í viðræðum um ítalska framherjann Fabio Borini en samkvæmt heimildum enska miðilsins er um kaupsamning að ræða að þessu sinni.

Borini sem var á sínum tíma fyrstu kaup Brendan Rodgers hjá Liverpool hefur ekki tekist festa sig í sessi hjá Liverpool en hann lék aðeins 20 leiki á fyrsta tímabili sínu hjá félaginu vegna meiðsla og skoraði í þeim tvö mörk. Eyddi hann öðru tímabili sínu í herbúðum Liverpool á láni hjá Sunderland þar sem hann lék alls 40 leiki og skoraði í þeim 10 mörk, meðal annars í úrslitum deildarbikarsins.

Liverpool samþykkti tilboð QPR og Sunderland í leikmanninn síðasta sumar en Borini var ekki tilbúinn til þess að gefast upp á ferli sínum hjá Liverpool og hafnaði tilboðunum. Hann fékk þrátt fyrir það fá tækifæri hjá Liverpool en hann lék átján leiki í öllum keppnum og skoraði aðeins eitt mark.

Ítalska félagið er á höttunum eftir framherja eftir að hafa selt þýska framherjann Mario Gomez til Besiktas á dögunum.