Erfiður missir

Birta, einn þekktasti köttur landsins og einn af fáum Sphynx köttum hérlendis, féll nýverið frá aðeins átta ára gömul eftir hjartaveikindi.   



Eigandi Birtu, Belinda Theriault, skrifaði barnabók um kisuna sína „Birta brött og bleik“ þar sem hin hárlausa Birta tekst á við fordóma og sýnir fram á hve fjölbreytileikinn er fallegur.   

Bókin, sem hlaut meðal annars hvatningarverðlaun Hugmyndasmiðjunnar, sló í gegn hjá yngri kynslóðinni og Belinda og Birta voru duglegar að heimsækja börn, bæði í skólum og á vegum Rauða krossins, og hvetja þau til að vera góð við hvert annað. 

Hvernig hefur þér tekist að komast yfir missinn?

„Ég hugsa til Birtu á hverjum degi og er óendanlega þakklát fyrir að hafa fengið að hafa hana hjá mér. Það er mér mikilvægt að vita að hún lifir áfram í bókinni sinni og í hjörtum barnanna sem hún snerti. Ég bjó einmitt til kveðjumyndband með myndum úr skólaheimsóknum Birtu og sjálfboðaliðastarf hennar hjá Rauða krossinum og það hjálpaði heilmikið í sorginni,“ segir Belinda en myndbandið má sjá neðst í greininni.

Ekkert dýr kemur í stað Birtu

„Núna er ég með litla svarta Sphynx kisu sem heitir Mús og fyrir viku síðan bættist svo við hvolpurinn Mía. Þau koma ekki í stað Birtu – hún var einstök- en þau eru hluti af fjölskyldunni á sínum eigin forsendum, miklir gleðigjafar. Dýrin kenna okkur svo margt og auðga lífið. Ég get ekki hugsað mér lífið án dýra og tel mig lánsama að upplifa sterka tengingu við þau.“ 

Belinda kvaddi kisuna sína með eftirfarandi kveðju:

„Elsku Birta mín, Að elska þig hefur gert mig að betri manneskju. Þegar þú komst inn í líf mitt grunaði mig ekki að þú ættir eftir að veita mér innblástur, að þú yrðir fyrirmynd og að við tækjum saman þátt í sjálfboðaliðastarfi. 

Þú heillaðir fólk upp úr skónum og það var ótrúlega gefandi að sjá hvernig þú náðir til barna. Þú varst svo falleg og hafðir svo fallega sál, en sumir þurftu smá tíma til að sjá fegurð þína. Aðrir sáu hana strax, sérstaklega börnin. Þú varst fyndin, ljúf, ástrík, félagslynd og þolinmóð. Þú varst fullkomin. Að kúra í sófanum með þér var það besta í heimi, að vakna á morgnana með þig í fanginu hámark hamingjunnar. 

Ég man þegar þú fyrst komst til mín og ég var ekki alveg viss í byrjun hvort þú og ég gætum orðið fjölskylda. Ég hafði litla reynslu af köttum og var enn í sárum eftir að hafa misst elsku Tíru mína, besta hund í heimi. En eftir tveggja daga „heimsókn“ vissi ég að þú værir komin til að vera. Hjarta mitt var þitt og þitt var mitt. Kærleikurinn á milli okkar var magnaður. Þvílíkt lán að fá að upplifa annað eins.“

Birta var með eigin fésbókarsíðu. Hana má sjá hér.