Ármann og Ingi áfram hjá Þór

Stuðningsmenn Þórs á Akueyri fengu góðar fréttir í gær þegar Ármann Pétur Ævarsson og Ingi Freyr Hilmarsson framlengdu samninga sína við félagið. Þetta kom fram á heimasíðu Þórs í gær.

Ármann og Ingi eru meðal reyndustu leikmanna Þórs. Ármann hefur verið í meistaraflokki síðastliðin 13 ár, leikið rúmlega 200 leiki fyrir félagið og skorað 56 mörk.

Ingi, sem leikur í stöðu vinstri bakvarðar, kom til félagsins 2010 og hefur síðan þá leikið tæplega 100 leiki og skorað þrjú mörk.

Þórsarar féllu úr Pepsi-deildinni í haust eftir tveggja ára dvöl. Í kjölfarið tilkynnti Páll Viðar Gíslason að hann væri hættur þjálfun liðsins eftir fjögur ár við stjórnvölinn. Við starfi hans tók Halldór Jón „Donni“ Sigurðsson, fyrrverandi þjálfari Tindastóls.