Við þurfum að gera eitthvað á leikunum

„Við erum með nokkuð sterkan hóp. Ég hugsa að við séum með fleiri jafnsterka einstaklinga en áður,“ segir Fjalar Úlfarsson, landsliðsþjálfari Íslands í alpagreinum skíðaíþrótta.

Fjalar er um þessar mundir í Austurríki ásamt landsliðsfólkinu Brynjari Jökli Guðmundssyni, Einari Kristni Kristgeirssyni og Maríu Guðmundsdóttur við æfingar og keppni fram að Vetrarólympíuleikunum í Sotsjí sem settir verða í lok næstu viku.

„Björgvin Björgvinsson var klassa ofar og svo auðvitað Dagný Linda Kristjánsdóttir þegar hún var. Ef þau eru eru frátalin er hópurinn líklega sterkari en áður.“

Auk fyrrnefndra þriggja skíðakappa keppir Helga María Vilhjálmsdóttir einnig í alpagreinum. Hún er hins vegar stödd í Noregi og mun taka þátt í hraðaæfingum með liði sínu og keppa í mótum þar til að brottför til Sotsjí kemur. Helga María er eini íslenski Sotsjífarinn sem keppir í risasvigi auk svigs og stórsvigs. Þá er gönguskíðagarpurinn Sævar Birgisson í hæðaraðlögun á Ítalíu auk þess sem hann mun keppa á heimsbikarmóti áður en að leikunum kemur.

„Okkur hefur gengið rosalega vel bæði í haust og í vetur,“ segir Fjalar um hin fjögur fræknu í alpagreinunum sem hann hefur umsjón með.

„Það er tilhlökkun og spenna í hópnum. Þetta er hins vegar ekki búið núna. Við þurfum að halda áfram fram að leikum og svo gera eitthvað á leikunum,“ segir Fjalar. Tónninn í máli hans gefur til kynna að spýta eigi í lófana í Sotsjí.

„Það er ekki verið að fara á Ólympíuleika bara til að horfa á. Við ætlum að gera okkar besta og ná árangri. Ekki bara vera með.“

Taugastríðið þegar á hólminn er komið getur verið mikið. Það er meira en að segja það að vera tilbúinn í ræsingu hátt uppi í fjalli vitandi að fylgst er með úr öllum áttum. Andlegur undirbúningur fyrir slíkar stundir er afar mikilvægur.

„Við höfum ekki sálfræðing með okkur en við höfum hins vegar aðgang að honum í okkar fagteymi,“ segir Fjalar. Heimsmeistaramótið í Schladming í febrúar í fyrra muni vonandi nýtast íslensku keppendunum.

„Við fórum með alla okkar keppendur í ólympíuhópnum þangað til að kasta þeim út í djúpu laugina. Viðburðurinn er rosalega stór og allt besta skíðafólk í heimi er meðal þátttakenda. Þau þekkja þetta því pínulítið.“

Íslenski hópurinn flýgur frá Þýskalandi til Rússlands 5. febrúar. Leikarnir verða settir föstudagskvöldið 7. febrúar í beinni útsendingu á Vísi.



Besti árangur í alpagreinum á síðustu átta leikum

ÓL 2010 í Vancouver

Björgvin Björgvinsson

43. sæti í stórsvigi

ÓL 2006 í Torino

Björgvin Björgvinsson

22. sæti í svigi

ÓL 2002 í Salt Lake City

Kristinn Björnsson

21. sæti í svigi

ÓL 1998 í Nagano

Sveinn Brynjólfsson

25. sæti í svigi

ÓL 1994 í Lillehammer

Ásta Halldórsdóttir

20. sæti í svigi

ÓL 1992 í Albertville

Kristinn Björnsson

43. sæti í risasvigi

ÓL 1988 í Calgary

Daníel Hilmarsson

24. sæti í svigi

ÓL 1984 í Sarajevo

Nanna Leifsdóttir

38. sæti í stórsvigi