Bæjarfulltrúi: Reykingabann verði að veruleika innan skamms

Reykingar verða ekki bannaðar á opnum svæðum í Kópavogi. Tillaga um að ákvæði þess efnis yrði í nýrri lögreglusamþykkt bæjarins var ekki samþykkt. Ómar Stefánsson bæjarfulltrúi Framsóknarflokksins í Kópavogi stóð á bak við tillöguna.

Hann lagði til að bannað yrði að reykja á opnum svæðum, göngustígum og við opinberar byggingar sem tilheyra Kópavogi. Hann segir fordæmi fyrir banni sem þessu að finna í bæjum og borgum víðsvegar í heiminum. „Í New York er bannað að reykja í görðum og á göngustígum. Í Gautaborg er síðan til dæmis bannað að reykja í biðskýlum,“ segir Ómar í samtali við Vísi.

Ómar segist algjörlega sannfærður um að það sé aðeins tímaspursmál hvenær reykingarbann verði að veruleika í Kópavogi. „Og ekki bara þar heldur út um allt.“

Aðspurður hvenær hann haldi að slíkt bann verði komið á svarar hann því til að hann sé 47 ára og hann muni lifa það.

Vissulega hafi verið langt gengið með því að leggja þetta til. En það hafi lengi verið þannig að þegar fyrstu skrefin eru tekin að fólki finnist langt gengið. „Ég var ekkert að fatta upp á þessu og svona bann hefur gengið upp víðsvegar úti í heimi.“

Reykingabann gangi ekki of langt gegn reykingafólki

Honum finnst  þó að með slíku banni sé ekki langt gengið gegn reykingarfólki. Þó reykingafólk sé almennt mun tillitsamara en það var fyrir nokkrum árum þá vanti enn upp á. Hann nefnir til dæmis Smáralindina í því samhengi en þar standi fólk við innganginn og reyki þannig að það trufli aðra. En allir eigi rétt á því að anda að sér hreinu lofti.  

„Þegar ég byrjaði að vinna í bæjarráði var reykt inní fundarherberginu. Það eru bara svona 12 til 15 ár síðan,“ segir Ómar. Því hafi nú talsvert breyst á þeim tíma.

Ómar kveðst sjálfur aldrei hafa reykt. „Ég er viðurkenndur „fanatíker“,“ segir hann.