Indriði Áki á leið frá Val

Indriði Áki Þorláksson, leikmaður Vals, er á leið frá félaginu en samkvæmt heimildum Vísis eru afar sterkar líkur á að hann verði lánaður annað.

Magnús Gylfason, þjálfari Vals, staðfesti í samtali við Vísi að það mál sé í ferli en að enn sé ekkert komið á hreint.

„Indriði missti af stórum hluta undirbúningstímabilsins og hefur ekki náð sér almennilega á strik í sumar. Það er því verið að skoða hvort það væri best fyrir hann fara á láni annað. Það er verið að skoða það,“ sagði Magnús.

Indriði hefur komið við sögu í átta deildarleikjum Vals í sumar, þar sem fimm sinnum sem byrjunarliðsmaður. Hann hefur skorað eitt mark í þeim leikjum.