ESA kærir ríkið vegna vanefnda á innleiðingu EES tilskipunar

ESA, eftirlitsstofnun EFTA, hefur ákveðið að stefna íslenska ríkinu vegna vanefnda á innleiðingu Evróputilskipana. Íslenska ríkinu hefur ekki tekist að innleiða tilskipun um merkingar og staðlaðar vörulýsingar á orkunotkun heimilistækja. Ísland átti að innleiða tilskipunina fyrir 1. júní árið 2013.



Íslensk stjórnvöld hafa fengið tækifæri til að gera bragarbót á reglum sínum, innleiða tilskipunina eða koma með rök fyrir því hvers vegna EES-reglurnar hafa ekki verið samþykktar. Það að fara með málið fyrir EFTA-dómstólinn er lokaúrræði eftirlitsstofnunarinnar. 

Íslensk stjórnvöld standa sig afar illa þegar kemur að því að innleiða EES tilskipanir í íslenska löggjöf. Vísir hefur áður greint frá því að frammistaða Íslands er sú allra versta. Í frammistöðumati Eftirlitsstofunar EFTA (ESA) segir að innleiðingarhalli tilskipana, sem sýni hlutfall tilskipana sem ekki hafa verið innleiddar eða ESA hefur ekki verið tilkynnt um innleiðingu á innan réttra tímamarka, hafi verið 3,1 prósent í tilviki Íslands. 

Í frammistöðumatinu kemur einnig fram hversu mörg samningsbrotamál gegn EFTA-ríkjunum eru til meðferðar hjá ESA, sem stafa af því að tilskipanir og reglugerðir eru ekki innleiddar innan tímamarka. Samningsbrotamál af þeim toga eru nú 177 talsins.