Búllan sterk í London

Hamborgarabúllan í Lundúnum er nú einn heitasti hamborgarastaðurinn í borginni en nú standa yfir kosningar á síðunni www.thecityawards.com til að velja besta hamborgarann í bænum. Búllan er nú í öðru sæti og fylgir fast á hæla veitingahússins Patty & Bun. Fyrsta Búllan var opnuð í Lundúnum sumarið 2012 í litlu húsi í Marylebone-hverfi sem stóð til að rífa. „Það var ágætis staðsetning til að prófa þessa hugmynd og sjá hvort Búllan ætti erindi við Lundúnabúa,“ segir Sigurður Gunnlaugsson, yfirkokkur á Búllunni.

„Þegar við opnuðum gekk mikið hamborgarafár yfir London og svo virtist á tímabili að annar hver maður væri hamborgarabloggari. Það hjálpaði okkur helling því við fengum fullt af ókeypis umfjöllun fyrir vikið. Í framhaldi af því og nokkrum mjög jákvæðum umfjöllunum í nokkrum stærstu fríblöðunum, sem dreift er á öllum lestarstöðvum, varð fljótt mjög mikið að gera hjá okkur.“

Í mars á þessu ári var síðan opnuð önnur Búlla á King‘s Road í Chelsea-hverfi. „Við erum jafnt og þétt að stimpla okkur inn í það hverfi með stöðugri aukningu og fleiri fastakúnnum, ekki síst eftir að dagblaðið The Independent valdi okkur sem bestu borgarana í Lundúnum í lok sumars.“

Þegar blaðamann Vísis bar að garði í Lundúnum í síðasta mánuði var Búllan með bás á Meatopia, stórri matarhátíð í borginni. Búllubásinn var sá vinsælasti á hátíðinni en röðin virtist ekki ætla enda að taka. Þá fuku út 600 hamborgara á mettíma.

Samkvæmt Sigga og hamborgarasveinum Búllunnar hafa nokkrir frægir gestir heiðrað staðinn með nærveru sinni. „Reglulega sjáum við fréttir af því að heiman að David Beckham sé reglulegur gestur á Búllunni. Ég veit ekki hversu mikil áhrif það hefur haft á gestafjöldann okkar en hins vegar birtist grein í Evening Standard, einu stærsta fríblaði í London, um að Brooklyn Beckham sonur hans væri fastagestur hjá okkur. Hver veit nema það fyllist allt af átjan ára stelpum hjá okkur í framhaldi af því.

En að öllu gríni sleppt þá hefur öll svona athygli að sjálfsögðu góð áhrif þar sem það eru líklega yfir 20.000 veitingastaðir í London og því margir um hituna.“