Ekkert mál að koma aftur heim

Albert Brynjar Ingason er leikmaður 16. umferðar Pepsi-deildar karla að mati Fréttablaðsins, en hann skoraði tvö mörk í 4-1 sigri Fylkis á Þór á mánudagskvöldið. Alls hefur Albert skorað fjögur mörk í fjórum leikjum síðan hann kom frá FH í síðasta mánuði.

Í samtali við Fréttablaðið í gær sagðist hann vera ánægður með að vera kominn aftur í Árbæinn:

„Það var ekkert mál að koma aftur. Ég þekki allt og alla í kringum félagið og það var ánægjulegt að hafa byrjað strax að skora. En það mikilvægasta er að ná í stig, sem við höfum verið að gera að undanförnu,“ sagði Albert.

Fylkir hefur fengið tíu stig í síðustu sex leikjum, sem hafa allir verið á heimavelli, en liðið á einn leik eftir í þessari miklu heimaleikjatörn. Albert segir mikilvægt fyrir Fylki að standa sig vel á heimavelli:

„Við viljum gera þetta að alvöru heimavelli, fyrst hann er orðinn svona flottur. Það er ótrúlegt hvað það breytir miklu að fá nýja stúku,“ sagði Albert að endingu.