Ólafur fær góða dóma í Danmörku

Torbein Weirup skrifar dóm um sýningu Ólafs Elíassonar, Riverbed, á menningarsíðu Berlingske í gær undir fyrirsögninni Þetta er ekki mynd af landslagi – þetta er landslag.

Þar segir hann að venjulega megi menn ekki snerta listaverk á sýningum, hvað þá ganga á þeim en á sýningu Ólafs Elíassonar séu gestir neyddir til að gera það, enda sé um að ræða magnþrungið íslenskt landslagt úr grjóti og möl sem breiði sig yfir salina.

Þó sé það eitt augnablik, eftir að komið er á staðinn, sem smá skúffelsi geri vart við sig og hugsunin: Er ég kominn til Humlebæk til að sjá malarhrúgu?

Svo einfalt sé málið ekki frekar en oft áður þegar Ólafur Elíasson eigi í hlut.

Hann hafi flutt eitt stykki íslenska náttúru með grjóti og lækjarfarvegi og komið því fyrir milli hinna hvítu veggja safnsins.