Beikonið yfirtekur borgina

„Beikonið mun flæða niður Skólavörðustíginn og ég lofa góðu stuði og góðum mat,“ segir Árni Georgsson, einn af stofnendum hátíðarinnar Reykjavík Bacon Festival, sem haldin verður hátíðleg fjórða árið í röð á Skólavörðustíg í dag.

Um er að ræða mikla matarhátíð undir yfirskriftinni Matarhátíð alþýðunnar en fjölmargir veitingastaðir munu selja beikoninnblásna rétti í matartjöldum víðs vegar á Skólavörðustígnum. Ágóði af hátíðinni rennur til Umhyggju, styrktarfélags langveikra barna.

Árni er mikill beikonáhugamaður og reykir sitt eigið beikon. „Ég hef reykt mitt eigið beikon á Svínanesi í Svínahlíð í Grafningnum í Þingvallasveit og er þar með reykskúr við sumarbústaðinn. Ég hef mjög gaman af svínum og í raun öllum dýrum,“ segir Árni.

Spurður út í hvort neysla á beikoni sé óholl segir Árni hófsemi skipta miklu máli. „Í beikoni eru næringarefni sem þú þarft en eins og með allt annað þá þarf að gæta hófs í neyslunni. Þetta snýst um að neyta þess á ábyrgan hátt. Það er einhver ástæða fyrir því að svín hafa fylgt okkur þetta lengi,“ segir Árni.

Reykjavík Bacon Festival er systurhátíð Blue Ribbon Bacon, stærstu beikonhátíðar í heimi, sem haldin er ár hvert í Des Moines í Iowa. „Það eru tveir Bandaríkjamenn sem eru komnir til okkar, Brooks Reynolds og Marshall Porter, þeir eru goðsagnir í beikonheiminum og halda stærstu beikonhátíð í heimi. Þeir eru að koma hingað fjórða árið í röð og kunna vel við sig,“ bætir Árni við.

Hátíðin er haldin af nokkrum vinum og er skipulagningin öll unnin í sjálfboðavinnu og munu 60 sjálfboðaliðar frá Veraldarvinum hjálpa til á hátíðinni ásamt fleirum.

Leiktæki, beikon og skemmtiatriði verða í boði fyrir alla.