Draugur við Duusbryggju

Höfnin og hafið eru í aðalhlutverki í hafnargöngu Borgarbókasafns Reykjavíkur sem nefnist Mararþaraborg. Þar verður gengið meðfram Reykjavíkurhöfn, frá Miðbakka í átt að Granda.

Höfnin og hafið koma víða við í íslenskum bókmenntum, bæði í ljóðum og lausu máli, og gefst gestum færi á að smakka á afurðum sjávarins í meðförum rithöfunda frá ýmsum tímum og úr ólíkum áttum. Við sögu koma meðal annars draugur við Duusbryggju, þulur um hafið og frásögn af óvæntum ráðningum á togara.



Gangan, sem er hluti af kvöldgöngum menningarstofnana Reykjavíkurborgar, verður farin annað kvöld klukkan 20 og er lagt upp frá Grófarhúsi, Tryggvagötu 15. Gert er ráð fyrir að hún taki um 90 mínútur. Leiðsögumenn eru Einar Ólafsson og Úlfhildur Dagsdóttir.

Aðgangur er ókeypis og allir velkomnir.