Fundu sögurnar á bak við nöfnin

Þetta er samstarf Hollvina Húna II og Leikfélags Akureyrar sem fengu styrk frá Menningarsjóði Eyþings til þess að búa til leiksýningu um borð í Húna II,“ segir Vala Höskuldsdóttir, leikstjóri sýningarinnar Sértu velkominn heim sem frumsýnd verður í kvöld. „Leikararnir eru úrvalslið úr leiklistarskóla L.A. á aldrinum 13 til 15 ára. Upprennandi stjörnur, auðvitað, og mörg þeirra hafa oft stigið á svið áður. Þetta er algjört stórskotalið.“



Vala segir strangar æfingar hafa staðið yfir allan júlí. „Þemað sem við fengum var strandmenning og við höfum verið að safna sögum frá sjómönnum, öfum, ömmum og ýmsum fræðingum um það hvernig lífið var í strandbæjunum þegar við vorum öll miklu tengdari sjónum en við erum núna. Auk þess töluðum við við fræðing sem samdi lokaritgerðina sína um óskalög sjómanna. Útkoman er svo þessi fallega klukkutíma sýning sem við unnum upp úr sögum og lögum sem við þekkjum um sjómennina og líf þeirra.“



Spurð hvort verkið sé söngleikur segir Vala að það megi alveg segja það. „Það er mikið sungið og svo finnum við sögurnar á bak við ýmis nöfn sem við þekkjum eins og Hríseyjar-Mörtu og Siglufjarðar-Geira til dæmis.“



Aðeins þrjár sýningar eru fyrirhugaðar á Akureyri, í kvöld og miðvikudags- og fimmtudagskvöld í næstu viku, en síðan verður siglt um Eyjafjörðinn og sýnt á Dalvík, Grenivík og í Hrísey. Áhorfendafjöldi takmarkast við stærð bátsins og einungis verða seldir fimmtíu miðar á hverja sýningu. Á Akureyri liggur báturinn við Torfunesbryggju, „litlu bryggjuna á móti Subway,“ eins og Vala orðar það og miðasala er bæði á netfanginu midasala@leikfelag.is og við innganginn.