Malala heldur til Nígeríu

Hin sautján ára Malala Yousafzai frá Pakistan hefur strengt þess heit að hjálpa til við að frelsa stúlkurnar sem öfgasamtökin Boko Haram rændu í Bomo-héraði í Nígeríu í apríl þegar hópur vopnaðra manna ruddist inn í skóla að næturlagi og skipaði stúlkunum upp á vörubílspalla. Boko Haram-samtökin hafa barist fyrir stofnun íslamsks ríkis í Nígeríu síðustu ár.

„Þessar stelpur eru eins og systur mínar og ég ætla að tala þeirra máli þar til þeim verður sleppt,“ sagði Malala á fundi í gær með foreldrum sumra þeirra barna sem saknað er, sem haldinn var í höfuðborginni Abuja.