„Koddinn bjargaði mér“

Hjónin Arndís Hjartardóttir og Finnbogi Bernódusson í Bolungarvík fengu heldur óskemmtilega brúðkaupsafmælisgjöf milli jóla og nýárs þegar svefnherbergisloftið bókstaflega féll ofan á andlit þeirra.

„Við vöknuðum bara við óskaplegan þrýsting í herberginu. Það gerði svona óskaplega hviðu sögðu þau sem voru vakandi í húsinu, að koma heim eftir ball. Þetta var eins og hvirfilbylur sem fór fyrir húshornið og það myndaðist svona mikið sog í húsinu og loftið bara datt niður yfir okkur,“ segir Arndís sem er nokkuð létt yfir því að engan hafi sakað.

Gert grín að koddanum

BB.is greindi frá því í gær að börn hjónanna og barnabörn hafi verið vakandi á neðri hæð hússins og hafi ekki ætlað að trúa eigin augum þegar þau kíktu inn í herbergi.

„Koddarnir björguðu mér, það er oft búið að gera grín af því að ég sé með koddana yfir mér,“ segir Arndís sem sefur með höfuðið undir koddanum og samkvæmt dóttur hennar jafnvel með sængina yfir koddanum.

„Hann fór verr út blessaður eiginmaðurinn, hann er allur krambúleraður en lampinn fór verst, hann fór úr hálsliðnum,“ segir Arndís og hlær.

Aðspurð um það af hverju hún sefur með koddann yfir andlitinu segir Arndís: „Það hefur nú kannski verið fært aðeins í stílinn með það en ég er alltaf með stóran kodda yfir mér sem ég nota þegar ég er að lesa.“

Alltaf ævintýri á þessum degi

Þau hjónin segjast ekki hafa látið þetta koma sér úr jafnvægi enda hefur áður mikið gengið á veðurfarslega séð á þessum degi hjá þeim.

„Þessi dagur hefur alltaf verið minnisstæður, brúðkaupsafmælisdagurinn okkar. Það eru 44 ár síðan við giftum okkur og veðrið setti líka strik í reikninginn þá því að við komumst ekki í eigin veislu sem átti að vera inni á Ísafirði,“ segir Arndís en veislan átti að fara fram í Fagrahvammi á Ísafirði en þá hafði fallið skriða á Óshlíðinni.

„Það er alltaf ævintýri hjá okkur á þessum degi,“ segir Arndís.