Jónsmessuganga á Seltjarnarnesinu

Hin árvissa Jónsmessuganga á Seltjarnarnesi verður farin í kvöld og er hún með sannkölluðum hátíðarbrag. Förinni er heitið milli stofnana á Seltjarnarnesi sem fagna stórafmæli á árinu rétt eins og bæjarfélagið sjálft en það fagnar 40 ára kaupstaðarafmæli.

Dagskráin hefst klukkan 20.00 í Valhúsaskóla, sem einnig er fjörutíu ára, þar sem Ásgerður Halldórsdóttir bæjarstjóri veitir viðtöku fyrsta eintaki af veglegu afmælistímariti Seltjarnarneskaupstaðar sem verið hefur í vinnslu um nokkurt skeið. Ritinu verður dreift á hvert heimili á Nesinu strax daginn eftir.

Í Valhúsaskóla syngur Selkórinn valin lög eftir Gunnar Þórðarson og síðan verður haldið út í sumarnóttina og gengið sem leið liggur að kirkjunni sem fagnar fjörutíu ára safnaðarafmæli og 25 ára vígsluafmæli á árinu. Í göngunni þangað verða 30 ára sögu sundlaugarinnar gerð skil.

Golfklúbburinn hélt upp á hálfrar aldar afmæli á árinu og verður gengið frá kirkjunni í átt að golfvellinum. Í fjörunni nærri golfvellinum verður tendraður varðeldur, Bjarki Harðarson mætir með harmonikku, efnt verður til fjöldasöngs, eldlistamaður leikur listir sínar og boðið verður upp á veitingar fyrir unga sem aldna.

Stefán Bergmann líffræðingur, sem er flestum mönnum fróðari um Seltjarnarnesið, leiðir gönguna og veitir mönnum án efa gott yfirlit yfir sögu Seltjarnarness fyrr og nú.