Meirihluti borgarbúa vill að Dagur B. Eggertsson, oddviti Samfylkingarinnar í Reykjavík, verði borgarstjóri að loknum kosningum. Hann ber höfuð og herðar yfir aðra oddvita samkvæmt skoðanakönnun Fréttablaðsins og Stöðvar 2.

Alls vilja 52,6 prósent borgarbúa að Dagur, sem nú gegnir embætti forseta borgarráðs, verði næsti borgarstjóri Reykjavíkur. Stuðningur við Dag er meira en tvöfalt meiri en kjörfylgi Samfylkingarinnar, en um 23 prósent borgarbúa myndu kjósa flokk Dags yrði gengið til kosninga nú.

Nær allir stuðningsmenn Samfylkingarinnar, 92,9 prósent, vilja Dag sem borgarstjóra. Þá vilja 59,7 prósent stuðningsmanna Bjartrar framtíðar Dag í borgarstjórastólinn, eins og 38,1 prósent stuðningsmanna Pírata og 34,6 prósent kjósenda Vinstri grænna.

Halldór Halldórsson, oddviti Sjálfstæðisflokksins, nýtur næst-mests stuðnings til að gegna embætti borgarstjóra eftir kosningar. Alls segjast 19,6 prósent vilja að hann fylli spor Jóns Gnarr, sem hefur ákveðið að gefa ekki kost á sér í kosningunum. Stuðningur við Halldór er örlítið minni en stuðningur við Sjálfstæðisflokkinn, sem mælist 23,1 prósent í könnuninni, og afar lítill meðal stuðningsmanna annarra flokka.

Þriðji oddvitinn sem fær stuðning meira en fimm prósenta kjósenda er Björn Blöndal, oddviti Bjartrar framtíðar, arftaka Besta flokks Jóns Gnarr borgarstjóra. Um 7,6 prósent vilja að Björn verði borgarstjóri eftir kosningar. 

Athygli vekur að aðeins 33,8 prósent kjósenda Bjartrar framtíðar vill að Björn verði borgarstjóri, en 59,7 prósent vill heldur Dag B. Eggertsson.

Aðrir oddvitar eru með minni stuðning til að gegna embætti borgarstjóra. Um 4,6 prósent vill að Sóley Tómasdóttir, oddviti Vinstri grænna, taki við embættinu, og 3,2 prósent vill Halldór Auðar Svansson, oddvita Pírata. Þá vilja 1,5 prósent Óskar Bergsson, oddvita Framsóknarflokksins, og 0,7 prósent Þorleif Gunnarsson, oddvita Dögunnar.

Hátt hlutfall þátttakenda í könnun Fréttablaðsins og Stöðvar 2, um 40 prósent, sögðust ekki hafa gert upp við sig hvað þau ætluðu að kjósa. Dagur nýtur langmests stuðnings meðal þessa hóps. Um 62,7 prósent óákveðinna vill að hann verði borgarstjóri en 13,3 prósent vill heldur Halldór Halldórsson.

Aðferðafræðin

Hringt var í 1.241 manns þar til náðist í 805 manns samkvæmt lagskiptu úrtaki miðvikudaginn 12. mars. Svarhlutfallið var 65 prósent. Þátttakendur voru valdir með slembiúrtaki úr þjóðskrá. Svarendur skiptust jafnt eftir kyni, og hlutfallslega eftir aldri. Spurt var: Hver vilt þú að verði borgarstjóri eftir kosningarnar? Alls tóku 50,8 prósent þeirra sem náðist í afstöðu til spurningarinnar.