Ballbann í MS vegna ölvunar nemenda

„Ástæðan fyrir þessu dansleikjabanni er að okkur hefur fundist hlutirnir ekki hafa gengið nógu vel og það hefur verið allt of mikið um ölvun,“ segir Már Vilhjálmsson, rektor Menntaskólans við Sund. Mikil drykkja og önnur brot á árshátíð skólans sem fram fór í Gullhömrum fyrir skömmu fylltu mælinn og hefur því verið sett á svokallað dansleikjabann.

„Þetta er kannski ekki dansleikjabann heldur frekar dansleikjahlé. Við ætlum að endurskoða hlutina og sjá hvernig þetta geti farið betur fram,“ bætir Már við.

Mikilli ölvun fylgir oft ofbeldi. „Það er orðið regla að á öllum stórum dansleikjunum er ofbeldi og það er auðvitað ekki í lagi. Auðvitað viljum við heilbrigt og gott skemmtanalíf en við þurfum nýjar leiðir til að breyta þessu. Í núverandi ástandi get ég ekki tryggt öryggi nemendanna,“ útskýrir Már.

Í kringum árið 2006 hætti skólinn að halda opin böll vegna þess að talið var að nemendur úr öðrum skólum væru orsök margra brota sem fram fóru á dansleikjum í þá daga. Að halda lokuð böll breytti þó litlu. „Ástandið breyttist lítið við þær breytingar.“

Á dansleikjum skólans eru þeir sem eru ölvaðir teknir inn í svokallað sjúkraherbergi og ef aðilinn er yngri en átján ára er hringt í foreldra og neminn sóttur. „Í heildina séð hagar meirihlutinn sér vel á böllum.“

Már segir þetta mikla synd, því þeir sem séu í formennsku nemendafélagsins, séu að vinna mikla vinnu og séu þetta því mikil vonbrigði. „Það er mikil vinna á bak við böllin. Við fundum alltaf fyrir dansleiki og förum yfir reglur og annað slíkt en þrátt fyrir alla þessa vinnu þá miðar okkur ekkert áfram,“ bætir Már við.

Dansleikjabannið svokallaða verður í gildi út skólaárið en stjórnendur skólans ætla að reyna að finna lausn á vandanum með nemendum. „Við ætlum að finna það út með nemendum hvernig best sé að breyta þessu. Forsenda þess að það verði áframhald á dansleikjahaldi er að við finnum áhrifaríkari leiðir til að hafa hlutina í lagi.“

Fréttablaðið setti sig í samband við nokkra nemendur skólans og voru flestir hissa á þessari ákvörðun skólastjórnenda en ætluðu að hlíta þessum fyrirmælum.

) )