Fyrstu tónleikarnir á Íslandi

„Þetta var hálfgerð skyndiákvörðun. Ég var í viðtali hjá Matta í Popplandinu á Rás 2 og hann spurði mig hvort við ætluðum ekki að fara að halda tónleika á Íslandi. Ég gat eiginlega ekkert sagt þá, enda erum við allir fátækir tónlistarmenn og það er dýrt að fljúga frá Los Angeles til Reykjavíkur, en um leið og ég lagði á fór ég að hugsa þetta betur og fannst alls ekki galin hugmynd að gera þetta svona,“ segir Jökull Ernir Jónsson, forsprakki hljómsveitarinnar The Evening Guests, sem heldur sína fyrstu tónleika á Íslandi á Gauknum í kvöld ásamt sveitunum Lily of the Valley og Blær.

Jökull Ernir er búsettur í Los Angeles þar sem hann starfrækir The Evening Guests, sem leikur nokkurs konar sambland af indírokki og írskri þjóðlagatónlist, ásamt hópi bandarískra tónlistarmanna og bassaleikara frá Taívan. Sveitin sendi frá sér sína fyrstu EP-plötu, Not in Kansas Anymore, á síðasta ári og nýttu sér vefsíðuna Kickstarter.com til að fjármagna gerð hennar. Útgáfa The Evening Guests sem kemur fram á Gauknum í kvöld er þó frábrugðin þeirri sem alla jafna er.

„Það hefði verið svo rosalega dýrt að fljúga öllum strákunum hingað frá Bandaríkjunum að ég ákvað að hóa saman í íslenska útgáfu af sveitinni og hringdi í nokkra vini mína sem eiga það sameiginlegt að vera frábærir tónlistarmenn,“ útskýrir Jökull Ernir og segist til að byrja með ekki hafa vitað við hverju hann ætti að búast á fyrstu æfingunni. „En þetta eru svo klárir strákar og svo fljótir að læra að þetta kom virkilega skemmtilega á óvart. Þeir fá frelsi til að setja sinn svip á tónlistina og ég er viss um að þetta verður alveg frábært.“

Jökull Ernir hefur verið búsettur í Los Angeles í um þrjú ár og hefur lokið þar gítarnámi og einnig námi sem nefnist Sjálfstæði listamaðurinn, eða The Independent Artist. „Það er mjög fjölbreytt nám sem inniheldur meðal annars upptökustjórn, grafíska hönnun og í raun flest sem þarf að kunna til að koma sjálfum sér á framfæri sem listamaður,“ segir Jökull, sem viðurkennir fúslega að það sé allt annað en ókeypis að vera starfandi listamaður í draumaborginni vestra.

„Ég tek að mér ýmis verkefni til að ná endum saman, til dæmis vann ég hjá Universal-kvikmyndatökuverinu við að hræða fólk á síðustu hrekkjavöku. Þetta er dálítið skrýtinn heimur hérna úti. Ég bý í Hollywood og þessi staður hættir aldrei að koma mér á óvart.“