Ekki hægt að meta áhrifin af niðurfellingum ríkisstjórnarinnar

Sigmundur Davíð Gunnlaugsson forsætisráðherra segir ekki hægt að meta hver áhrifin af lækkun höfuðstóls verðtryggðra húsnæðislána verði á mismunandi hópa í samfélaginu.

Þetta kemur fram í svari við fyrirspurnÁrna Páls Árnasonar, formanns Samfylkingarinnar, á Alþingi. Árni Páll óskaði eftir skriflegum skýringum á áhrifunum á fólk eftir því hversu hátt hlutfall það skuldar í húsnæði sínu, hversu margir af þeim sem eru með yfir 100 prósent skuldahlutfall komist undir þau mörk vegna leiðréttingarinnar, og fleira.

Í svari Sigmundar segir að engin gögn séu til sem geti sagt til um áhrifin á mismunandi hópa. Notast hafi verið við framtalsupplýsingar frá ríkisskattsjóra við mat á umfangi aðgerðanna, en á næstunni muni stjórnvöld safna frekari upplýsingum um dreifingu leiðréttingarinnar.

Sigmundur Davíð ítrekar að aðgerðirnar séu ekki félagsleg úrræði heldur sé þeim ætlað að taka á vanda heimila sem sé til kominn vegna ófyrirsjáanlegrar hækkunar höfuðstóls verðtryggðra lána vegna gengislækkun íslensku krónunnar. Þær eigi að nýtast öllum, óháð tekjum, skuldum og fjárhagsstöðu að öðru leyti.