Telur Peysópicker á vegum manns sem er ekki í Verzló

„Við erum komin með ágætar heimildir fyrir því hver þetta sé. Þetta er aðili sem er ekki í skólanum,“ segir Sigrún Dís Hauksdóttir, formaður Nemendafélags Verslunarskóla Íslands um vefsíðuna Peysopicker.com sem Vísir hefur fjallað um.

Síðan hefur aður skotið upp kollinum: „Hann hefur sagst tilbúinn loka henni ef hann fengi Auroracoins inn á lokaðan reikning,“ bætir Sigrún við.

Á síðunni er birtur topp tíu listi yfir stráka og stelpur í fjórða bekk Verzlunarskólans. Listinn er unninn upp úr atkvæðum notenda síðunnar, sem eiga að velja á milli mynda af tveimur einstaklingum í einu. Sá sem fær atkvæðið fær stig sem eru notuð til að ákvarða listann.

Síðan hefur skotið upp kollinum nokkrum sinnum áður en alltaf verið lokað nokkuð skyndilega. Hún opnaði nú síðast fyrir tveimur dögum síðan og hefur Nemendafélag VÍ fordæmt síðuna.

Nafn síðunnar vísar til Peysufatadagsins sem er árleg hátíð Verzlinga. Í ár fór hann fram í apríl.

Ítrekað hefur verið reynt að komast að því hver haldi síðunni úti. Að sögn Sigrúnar var síðan vistuð í Bandaríkjunum og var greitt fyrir hana með gjaldmiðlinum Bitcoin. En nú telur nemendafélagið sig hafa komist að því hver standi að baki síðunnar.

„Ég veit ekki hver tilgangurinn er að gera svona. Mér dettur ekkert annað í hug en að þessi einstaklingur vilji sverta orðspor skólans,“ segir Sigrún. Hún segir ekki vitað hvað verði gert í málinu. „Við ætlum fyrst að ganga algjörlega úr skugga um að við séum með réttan mann. Svo ætlum við að ræða málin við hann á rólegu nótunum. Við vitum ekki hvort við höfum eitthvað til að kæra núna, við viljum bara ræða við hann og biðja hann að leggja síðuna niður.“

Hún segir þann sem heldur síðunni úti hafa stolið myndunum af vefsíðu Verzlunarskólans. „Já, þetta eru myndir sem eru nýteknar. Hann hefur tekið myndirnar þaðan.“