Kennarinn sem er sakaður um að leggja í einelti: "Mannorð mitt hefur verið sundurtætt“

„Mig langar að upplýsa ykkur um það að í morgun fór ég í veikindafrí sem mun vara þetta skólaár. Börnin ykkar hafa ekki farið varhluta af þeim málum sem ég hef verið að stríða við undanfarna mánuði,“ segir grunnskólakennarinn í Grindavík sem hefur að undanförnu  verið sakaður um að leggja tiltekna nemendur sína í einelti, í bréfi sem hann sendi foreldrum fyrr í dag.

Í bréfinu kemur fram að hann hafi farið í veikindafrí sem muni vara þetta skólaár.

Nánar verður fjallað um málið í kvöldfréttum Stöðvar 2.

Málið hefur vakið mikla athygli en Vísir sagði fyrst frá málinu í byrjun þessa mánaðar. Tvær formlegar kvartanir hafa borist skólayfirvöldum vegna kennarans og hafa þær verið til rannsóknar hjá sálfræðingum. Í öðru tilvikinu komust þeir að þeirri niðurstöðu að um staðfest einelti væri að ræða en í hinu var hegðun kennarans talin ámælisverð.

Kennarinn er sakaður um að hafa niðurlægt tiltekna nemendur ítrekað í kennslustofu fyrir framan samnemendur þeirra. Samnemendurnir tilkynntu eineltistilburði kennarans til umsjónakennara auk þess að senda tilkynningu í gegnum heimasíðu skólans.

Miklar deilur hafa sprottið upp í Grindavík vegna málsins, sem Vísir hefur fjallað um.

Í bréfinu til foreldra segir kennarinn mannorð sitt hafi beðið hnekki og telur sannað að hann hafi ekki lagt nemendur í einelti:

„Í máli því sem var til rannsóknar eftir áramót var niðurstaðan skýr um að ekki væri um einelti að ræða. Málum mínu linnir hins vegar ekki og nú hefur verið farið hamförum á samskiptamiðlum þar sem ummæli eru látin falla um mig og mína persónu. Ljóst er í mínum huga að mannorð mitt hefur verið sundurtætt og í svona umræðu er bara önnur hliðin sögð og ég get ekki varið mig vegna trúnaðar.“