Lestu þetta ef þú ert að farast úr stressi

Sigurbjörg Magnúsdóttir 28 ára nemi í sálfræði og einkaþjálfari, sem heldur úti Fitness form- síðu þar sem hún aðstoðar fólk þegar kemur að heilsusamlegu líferni, gefur lesendum Lífsins góð ráð við stressi.

Ekki detta í hvern megrunarkúrinn á fætur öðrum og hrasa inn í þann næsta því það endar bara með falli. Náðu taki á andlegri líðan og um leið byggðu upp líkamlegt hreysti. Ótrúlegustu hlutir gerast þegar hugur og líkami vinna saman sem heild. Þú átt bara eitt eintak af ÞÉR og þess vegna skaltu hugsa vel um þetta dýrmæta eintak. Við getum ekki gert copy/paste þó við vildum flest öll geta gert það ákveðnum tímapunkti. Það orsakar oft á tíðum streitu og kvíða að geta ekki uppfyllt allar kröfur okkar og annarra og þess vegna setjum við alltaf aðeins of mikla pressu á okkur.

Svefninn mikilvægur

Við þurfum að sofa vel, borða rétt og passa okkur á að láta ekki aðstæður og umhverfi stjórna líðan okkar. Þeir sem upplifa mikinn kvíða eða vanlíðan eiga á hættu á að fitna meira vegna þess að þeir finna huggun í mat eða sleppa því að borða, sem hægir jafnframt á brennslu líkamans.



Undraplanta gæti hjálpað

Drekktu Chamomile te. Margar rannsóknir hafa sýnt fram á þessi undraplanta getur hjálpað þér að takast á við óþægileg kvíðaeinkenni. Sérstaklega ef þú átt við svefnerfiðleika að stríða. 



Magnesíum er magnað

Magnesíum er algjörlega nauðsynlegt ef þú þjáist af mikilli streitu eða ert í streituvaldandi vinnu sem skapar þér kvíða. Magnesíum getur einnig haft áhrif á að þú tileinkir þér ný bjargráð við streituvaldandi umhverfi með því að hafa áhrif á boðefnastarfssemi heilans.

Omega er málið

Omega 3 fitusýrur; inntaka þeirra stuðlar að betri andlegri líðan ásamt því að styrkja ónæmiskerfi líkamans og minnkar bólgur.

Vatnið er nauðsyn

Tveir lítrar af vatni á dag kemur skapinu í lag. Ekki verra að setja sítrónu í það.

Minnka sykur og gosdrykkju

GABA (gamma-aminobutyric acid) taugaboðefni í miðtaugakerfi líkamans sem verður fyrir áhrifum vegna langvarandi streitu. Framleiðsla þess minnkar við langvarandi álag. Fæða sem eykur GABA í líkamanum eru til dæmis hnetur, bananar, brokkolí, spínat, grænt te, sítrus ávextir og hörfræ olía. Um leið er gott að minnka sykur, harða fitu, sælgæti og halda kaffidrykkju í skefjum.

Slökun

Leyfðu þér að slaka á. Prófaðu eitthvað nýtt. Farðu á jóganámskeið eða langþráð nudd. Taktu 15 mínútur á dag og hugleiddu, það eru engin geimvísindi –þetta eru 450 mínútur í einum mánuði eða 7,5 klukkustundir af þínum tíma. Hvað eyðir þú miklum tíma á facebook eða í símanum til dæmis?

Hlúðu að hjartanu

Ræktaðu sjálfan þig. Hjarta þitt pumpar dag hvern. Gefðu hjarta þínu eitthvað til baka sem sýnir að þú sért á lífi og hjarta þitt mun gefa enn meira í hvert pump sem styrkir þig enn fremur. Regluleg líkamsrækt (þá erum við ekki að tala um gönguna í matsalinn í hádeginu eða verslunarferðina sem þú fórst í gær ).

Hreyfing

Góð æfing er gulls í gildi. Hreyfing minnkar streituhormón í líkamanum og eykur á vellíðunar hormónin. Einungis 30 mínútna löng ganga á dag og það hefur frábær áhrif á heilsu þína og líðan. 

Ekki láta netið gleypa þig

Takmarkaðu tíma sem þú eyðir í tölvu, síma og sjónvarp. Það er í góðu lagi að fara á Facebook og kíkja á vini og vandamenn þar en þegar netið truflar daglegt líf þitt þá ættiru kannski bara að njóta augnabliksins. Prófaðu að minnsta kosti að eyða facebook „appinu“ í viku úr símanum þínum og kíktu einu sinni á dag í tölvuna ef þú kemst upp með það. 

Andaðu

Til eru margar öndunaræfingar sem geta verið hjálplegar þegar kvíði eða vanlíðan sækir á þig. Aflaðu þér réttra upplýsinga um öndun og „andaðu léttar“. Skoðaðu hugræna atferlismeðferð sem hjálpar þér að ná tökum á hugsunum eins og „ég get þetta ekki“ og breyta þeim yfir í „ég get þetta“. Hugur okkar er ótrúlegur. Hann á það til að stjórna okkur - þó okkur sé ætlað að vera með stjórnina.

Hér má lesa persónulega reynslu Sigurbjargar sem hún deildi með okkur í fyrra (sjón er sögu ríkari).