Telja að blóð geti hjálpað ebólusýktum

Talið er að blóð úr þeim sem læknast hafa af ebóluveirunni geti hjálpað þeim sem sýkst hafa af þessari skæðu veiru. Meðferðin er talin einföld en heldur óvenjuleg.  Ýmsir sérfræðingar, flestir á vegum Alþjóðaheilbrigðisstofnunarinnar, funda nú um málið í Genf.

„Þarna fáum við tækifæri til þess að prófa nýjar meðferðir. Af hverju ekki að prófa þetta, svo lengi sem þetta er ekki skaðlegt? Vonandi hjálpar þetta sjúklingunum og vonandi lærum við af þessu,“ segir Dr. Colin Brown, sem starfað hefur á heilsugæslustöðvum í Sierra Leone, í samtali við fréttastofu AP.

Meðferðin er ein af fjölmörgum tilraunameðferðum og leita sérfræðingar á vegum Alþjóðaheilbrigðisstofnunarinnar meðferðar sem talin er hvað öruggust.  Tilraunalyfið ZMapp hefur þegar verið tekið í notkun og var það gefið sjö einstaklingum. Tveir þeirra eru látnir. Lyfið er þó  uppurið og talið er að það muni taka nokkra mánuði að framleiða fleiri skammta.

Um 1.900 manns hafa orðið faraldrinum að bráð frá því hann kom fyrst upp í Vestur-Afríku á þessu ári. Um 3.500 eru sýktir og telur Alþjóðaheilbrigðisstofnunin líkur á að um 20 þúsund til viðbótar muni sýkjast af veirunni.  Stofnunin segir ebóluna stjórnlausa og telja samtökin Læknar án landamæra að heimsbyggðin sé að tapa í baráttunni gegn veirunni.