Goðsögn í trommuleik kennir á Íslandi

„Dave Weckl er einn áhrifamesti trommuleikari allra tíma og geðþekkur náungi, hann er jafnvígur á djass-, fönk- og latíntónlist. Það er einhvern veginn smá Dave Weckl í okkur öllum trommuleikurum. Stórkostlegur fagmaður og áhrifamaður í djass- og hryntónlist, fyrir utan að vera mikill áhugamaður um hraðskreiða bíla,“ segir trommuleikarinn Gunnlaugur Briem um kollega sinn Dave Weckl sem væntanlegur er hingað til lands í júlí.

Weckl kemur hingað til lands til þess að miðla þekkingu sinni til íslenskra trommuleikara og heldur fyrirlestur og sýnikennslu fyrir þá sem hafa áhuga á að skyggnast inn í hugarheim hans.

Dave Weckl hefur í raun verið goðsögn í tónlistarheiminum alveg frá því hann kom fyrst fram á sjónarsviðið með Electric-bandi Chick Corea árið 1986.

Weckl er almennt talinn einn al öflugasti djass-fúsjón-trommuleikari sögunnar og hafa fáir aðra eins tæknilega getu á hljóðfærið og er það mikil upplifun að sjá og heyra hann spila.

Weckl hefur í gegnum tíðina léð stórum nöfnum í tónlistinni krafta sína og má þar nefna aðila eins og Simon & Garfunkel, Robert Plant, Chick Corea og Mike Stern.

„Þetta er frábært tækifæri fyrir íslenska trommuleikara og jazzundendur að sjá, heyra og læra af einum fremsta trommuleikara heims,” bætir Gulli við.

Síðustu misseri hefur Weckl unnið mikið með gítarleikurunum Mike Stern og Oz Noy ásamt hljómsveit danska bassaleikarans Chris Minh Doky, Nomads.

Fyrirlesturinn fer fram í sal FÍH í Rauðagerði 27 þann 20. júlí næstkomandi og hefst klukkan 18.00.