Höfum ekki þorað að leika okkur á grasinu

Ísland mætir Eistlandi á Laugardalsvelli í kvöld en þá verður spilað á grasvellinum í fyrsta sinn eftir að hann eyðilagðist í vetrarhörkunni.

Grasvellir á höfuðborgarsvæðinu og víðar komu margir mjög illa undan vetri eins og knattspyrnuáhugamenn hafa fengið að kynnast í vor. Margir leikir á Íslandsmótunum hafa verið færðir til og spilaðir á gervigrasvöllum.

Það kom ekki til greina fyrir landsleikinn og ekkert annað í boði en að láta hann fara fram á þjóðarleikvanginum. Vallarstarfsmenn hafa því unnið hörðum höndum að því að sá fyrir nýju grasi og koma honum í stand með skömmum fyrirvara.

„Manni líður svona ágætlega,“ sagði Kristinn V. Jóhannsson, vallarstjóri Laugardalsvallar. „Hann hefði vissulega mátt vera betri en fyrst og fremst er maður þakklátur fyrir að Lars [Lagerbäck] og Heimir [Hallgrímsson] æfðu ekkert á vellinum.“

Kristinn segir að forráðamenn eistneska landsliðsins hafi einnig fallist á að æfa annars staðar en á keppnisvellinum og að það hafi ekki verið mikill þrýstingur frá Frömurum um að komast þar að. Fyrir það sé hann þakklátur.

„Svo hefur veðrið verið lygilegt - hiti, sól og rigning inn á milli. Næturfrostið hefur verið lítið þar að auki. Það hefur því allt gengið samkvæmt áætlun.“

Hann segir lítið annað hægt að gera en að vona það besta í kvöld en völlurinn verður svo skoðaður að nýju á morgun og metinn fyrir framhaldið.

„Við erum búnir að panta nýja sáningu sem kemur á morgun. Síðasta sáning hefur verið að koma virkilega vel upp þó svo að það séu nokkrir slæmir blettir hér og þar.“

Kristinn óttast þó ekki að grasið muni eyðileggjast á ný í kvöld. „Það kemur þá bara í ljós. Við höfum ekkert látið reyna á hann og ekki einu sinni þorað sjálfir að leika okkur á grasinu. Það er rigningaspá fyrir kvöldið og viðbúið að völlurinn verði blautur.“

„Það eina sem ég hef áhyggjur af er að leikmennirnir sem spila leikinn í kvöld eru flestir atvinnumenn. Leikmenn hér heima þekkja aðstæður vel en þessir strákar eru ekki vanir þessu.“

Kristinn segir enn óljóst hvort að Fram fái að spila á vellinum gegn Keflavík þann 10. júní. Þá spilar kvennalandslið Íslands gegn Möltu í undankeppni HM 2015 þann 19. júní.

„Við vonum bara það besta. Það sem mestu skiptir er að hér hefur verið unnið dag og nótt við að hafa þetta sem best.“